Stenio Junior hyri në pjesën e dytë në lojë ndaj Egnatias, por pa dyshim ishte lojtari më i mirë i ndeshjes. Braziliani mundi të shënojë dy gola dhe të shpëtojë skuadrën e tij nga humbja. Ish-sulmuesi i Shkëndijës ka folur t për “Panorama Sport”.
Ai foli për rastin e humbur ndaj Tiranës, si dhe faktin që skuadra duhet të bënte më shumë ndaj rrogozhinasve. Në lidhje me shqetësimin e Mehmetit, që Junior tregohet më efektiv nga stoli, ai shprehet se e ka bërë këtë vetëm dy herë, teksa ka mbi një vit te Partizani.
Nga e shtuna kur humbët atë shans shënimi në derbi, tek e shtuna tjetër kur hyni nga stoli dhe shënoni dy gola. Si jeni ndier gjatë gjithë kësaj jave?
Ishte një moment shumë i vështirë që e humba atë rast shënimi dhe pas asaj mora shumë kritika, por e pashë si diçka normale, sepse gjithçka ndodhi në një ndeshje shumë të rëndësishme për ne dhe tifozët. Unë i di përgjegjësitë e mia dhe jam munduar të qëndroj i qetë dhe i fokusuar në sfidat e radhës.
Dy gola për ju, por një rezultat jo i mirë për skuadrën. Pse ua bëri kaq të vështirë Egnatia?
Po unë shënova dy gola dhe është diçka shumë e mirë për mua personalisht, por për ekipin ishte një rezultat aspak i favorshëm, sepse ne duhet të shënojmë sa më shumë nëse duam të arrijmë objektivat tanë. Kishim shumë momente për të shënuar dhe për të qenë në avantazh, por nuk i shfrytëzuam si duhet. Gjithsesi, duhet të vazhdojmë të besojmë.
Përse jeni më shumë efektiv kur vini nga stoli? Këtë dilemë e kishte edhe trajneri Mehmeti pas ndeshjes…
Unë kam pak më shumë se një vit te Partizani dhe vetëm dy herë më ka ndodhur të shënoj kur kam hyrë në ndeshje si zëvendësues në pjesën e dytë. Nuk e kam kuptuar tamam çfarë ka dashur të thotë trajneri. Preferoj të mos komentoj, thjesht duhet të vazhdoj të bëj punën time me qetësi, siç kam bërë gjithmonë në karrierën time.
A dëshironi të vazhdoni me Partizanin pas fundit të sezonit?
Është shumë herët për të menduar mbi këtë çështje. Kontrata ime përfundon në qershor dhe mua më takon që të tregoj profesionalizëm deri në fund.
A mund të kualifikohet Partizani në kompeticionet europiane?
Po, sigurisht. Kemi një ekip shumë cilësor dhe besoj shumë se mund ta arrijmë objektivin tonë për t’u kualifikuar në kompeticionet europiane.
Sa i kënaqur jeni me atë që keni bërë në këtë sezon?
Mendoj se kam bërë mirë. Ndihem mirë dhe dua të vazhdoj kështu deri në fund të sezonit.
Cila ligë është më cilësore, ajo shqiptare apo maqedonase? Dhe cili është vend më i mirë për të jetuar, Tirana apo Tetova?
Liga shqiptare është më e mirë, e them me siguri. Për qytetet mendoj se Tirana është më e përshtatshme për të jetuar, por nuk e kam pasur aspak problem të jetoj në Tetovë. Gjithmonë jam pritur mirë nga njerëzit atje dhe kam shumë dashuri dhe respekt për ta.
A ka diçka që ju ka impresionuar te shqiptarët?
Për momentin nuk më vjen asgjë në mendje. Gjithçka është normale në këndvështrimin tim.
