Një emigrant shqiptar u kap, teksa ishte duke u kujdesur për një fermë të kanabisit prej 190 mijë paund në një ish-mulli në Brandford.
Shqiptari theu këmbën gjatë tentativës së tij të arratisjes, kur kërceu e u hodh nga çatia, shkruajnë mediat britanike.
Petref Leka, shtetas shqiptar u ndalua nga policia britanike, kurse një person i dytë arriti që të arratiset nga duart e policisë.
Leka, 23 vjeç u deklarua fajtor për prodhim e shitje të lëndëve narkotike dhe u dënua me 18 muaj burg. Prokurori Camille Morland tha se Policia mbërriti në ndërtesë në orën 9:30 të mëngjesit të 16 shkurtit dhe gjeti një fabrikë kanabisi në katër kate, brenda së cilës kishte 403 bimë të vogla dhe një dhomë tjetër në bodrum po përgatitej për të rritur më shumë drogë. Vlera e mundshme në rrugë e bimës narkotike ishte rreth 190 mijë paund.
Leka, shtetas shqiptar, tha se kishte shkruar në Mbretërinë e Bashkuar ilegalisht tetë muaj më parë dhe më pas nuk bëri komente të tjera kur u mor në pyetje nga Policia. Gjykatës Simon Hustler tha se i riu jetonte në kushte “të papërshtatshme”, ndërsa kujdesej për fabrikën.
Leka tha se ka shkuar për jetë më të mirë në Britani, ndërsa pranoi edhe akuzën.
