Nënkryetari i LSI, Petrit Vasili, tha në një konferencë për shtyp se civilë të paidentifikuar kanë dhunuar dhe arrestuar qytetarët të cilët protestojnë kundër rritjes së çmimeve.
“Jemi sëbashku për të vazhduar denoncimin e skandalit shumë të rëndë që vazhdon e thellohet lidhur me përdorimin kriminal të civilëve të paidentifikuar për të dhunuar dhe arrestuar qytetarët protestues.”-u shpreh Vasili.
Vasili thotë se veprimet mafioze, të policisë, janë tashmë të evidentuara me video, foto dhe dëshmi të mjaft personave.
“Paligjshmëria dhe veprimet mafioze të policisë janë tashmë të evidentuara me video, foto, dhe dëshmi të mjaft personave”, thotë ai.
Lidhur me këtë, Vasili kërkon largimin e ministrit të Brendshëm Bledi Çuçi dhe kryepolicit Gledis Nano.
“Ripërsërisim kërkesën për largimin e menjehershëm të Ministrit të Brendshëm Çuci dhe Drejtorit të Pergjithshëm të Policisë Gledis Nano dhe drejtuesve lokalë, të cilët nuk mund të rrinë më asnje sekond në karriget e tyre mbas veprimeve të paligjshme të civilave xhupzinj.”-tha Vasili.
Ndër të tjera nënkryetari i LSI, krahas videos ku shihen civilët duke arrestuar e dhunuar një të ri tek Zogu i Zi, thotë se LSI do t’i kërkojë Prokurorisë që të administrojë pamjet dhe të nisjë për urdhëruesit dhe autorët e tyre.
“Prokuroria shqiptare në mënyre të patolerueshme ka lidhur duart dhe ka mbyllur sytë duke mos ndërmarrë asnjë veprim për të ndëshkuar drejtuesit e policisë por edhe ekzekutorët me xhupa të zinj që konsumojnë vepra kaq të rënda penale. LSI, do ti kërkoje zyrtarisht prokurorisë të administorjë të gjitha këto pamje qe po publikojmë dhe të tjera që janë bërë publike në media vizive por edhe në media sociale, duke kërkuar që ajo të fillojë çështjen penale për urdhëruesit dhe autorët e tyre.”-deklaroi Petrit Vasili në një konferencë për shtyp.
