Ish-ministri i Drejtësisë, Selim Selimi, ka thënë se Kosova duhet të kërkojë mbylljen e Gjykatës Speciale.
Ai thotë se këtë Kosova duhet ta bëjë në bashkëveprim të ngushtë me ShBA’të dhe BE’në.
“Presidenca, Kuvendi dhe Qeveria e Kosovës duhet të fillojnë së vepruari e të inicojnë përpjekjet institucionale për ndryshimet ligjore të nevojshme me qëllim të përmbylljes së kësaj gjykate të fabrikuar në Moskë e Beograd.Në këto rrethana të reja është e pafalshme që Kosova të heshtë për këtë padrejtësi historike. Kurtha dhe kompromisi mashtrues shumë palesh me drejtësinë e agjendën e Putinit, në kurriz të së vërtetes sonë për luftën e udhëheqësit e UÇK-së në Gjykatën Speciale duhet të marrë fund!”, shkroi Selimi në një postim në Facebook.
Ai thotë se ” Lufta në Ukraine ka kthyer parimet e Nurembergut. Kjo luftë ka përmbysur konceptet e krimeve eventuale që i identifikon fituesin dhe humbësit”.
“Pas shpërfytyrimit agresiv e vrastar të Putinit e Rusisë në Ukrainë, miqtë ndërkombëtarë e kanë më të lehtë ta kuptojnë por edhe ta pranojnë mashtrimin, të vërteten dhe çmimin e padrejtësisë që Kosova sot po e paguan për llogari të ‘drejtësisë e barazisë’, të kërkuar pikërisht nga Beogradi e Moska e Putinit”.
“Atëherë kur cenohen vlerat progresive e të demokracisë, legjitimiteti vije mbi legalitetin. Në fund të fundit edhe intervenimi i NATO-s në Kosovë u bazua mbi legjitimitetin e jo mbi legalitetin”, ka shkruar Selimi.
Gjykata Speciale apo siç quhet zyrtarisht, Dhomat e Specializuara dhe Zyra e Prokurorit të Specializuar, është pjesë e sistemit gjyqësor të Kosovës, por me seli në Hagë.
