Euronews i ka kushtuar vëmendje protestave që po zhvillohen në Shqipëri nga qytetarët, pas rritjes së çmimit të karburaneteve dhe produkteve ushqimore, përfshi edhe ato të shportës.
Mijëra njerëz protestuan të shtunën në Tiranë kundër rritjes së çmimit të karburanteve, të cilat janë rritur më shumë se 40% brenda një jave, raporton Euronews.
Kjo është dita e katërt e protestave masive që kanë përfshirë disa qytete të këtij vendi të Ballkanit Perëndimor, ku paga mesatare mujore raportohet të jetë rreth 490 euro.
Fuqia e ulët blerëse e shqiptarëve ka të ngjarë të goditet nga rritja e çmimeve për shkak të destabilizimit të tregjeve nga lufta në Ukrainë dhe sanksioneve kundër agresionit rus.
Të mbledhur në sheshin qendror Skënderbej në qendër të Tiranës, turmat marshuan drejt selisë së qeverisë, duke mbajtur pankarta dhe duke brohoritur parulla kundër kabinetit të kryeministrit Edi Rama.
Një grup i vogël demonstruesish marshuan drejt stacionit të policisë për të kërkuar lirimin e dhjetëra njerëzve që ishin arrestuar në protestat e mëparshme.
Protestuesit marshuan edhe në disa qytete të tjera, përfshirë Lezhën në veri, ku një grup demonstruesish bllokuan për pak kohë trafikun në një rrugë kombëtare.
Me çmimin 180 lekë (1,5 euro) në pompë përpara pushtimit rus të Ukrainës më 24 shkurt, një litër naftë tani kushton deri në 290 lekë (2,37 euro).
Demonstruesit po bëjnë thirrje për taksa më të ulëta dhe programe ndihme për të zbutur goditjen ndaj familjeve me të ardhura të ulëta.
