Rast të rrallë në univers, e ka cilësuar deputeti Tomor Alizoti, sjelljen e Lulzim Bashës, i cili po përballet me kërkesën për largimin nga drejtimi i PD, për ti hapur rrugën bashkimit të demokratëve.
Ndërsa u largua nga mbledhja e Grupit Parlamentar, Alizoti tha se Basha nuk dorëhiqet. “Nuk dorëhiqet jo, thjesht thotë do mbledh Kolegjin e Kryetarëve, do mbledh këtë e atë, flet për hapa, por dorëheqja është akt, nuk janë hapa pas apo para”, tha Alizoti.
Ai u shpreh se Grupi Parlamentar nuk mund të marrë vendime për largimin e Bashës, nuk e ka në tagrin e tij, por ne mund ta pezullojmë si anëtar grupi.
“Nuk ka lidhje Grupi për të larguar Bashën nga drejtimi. Ne jemi në një mendje që ai të dorëhiqet, por ne si Grup nuk mund ta heqim nga posti kryetarit”, tha Aizoti.
Deklarata
‘Të vish në 2022 dhe të gjesh një parti që më kujton Spaçin apo Qafën e Barit, edhe pse ne jemi në perëndim, kjo nuk është parti.
Kushdo kryetar duhet të japë dorëheqjen, ky është modeli perëndimor.
Modeli putinist është se do të rrijë në krye.
Ai ka përdorur një fjalë kurth, tërheqje. Dorëheqja është dorëheqje. Mesa kuptova unë, ai nuk do të japë dorëheqjen.
Duhet që një njeri të japë dorëheqjen, të marrë përgjegjësi. Pse qenka e vështirë të ikësh nga pushteti. Partia ka 12 %. Jemi bërë një kopsht fëmijësh.
Një hap pas është taktikë, dorëheqja është dorëheqje’.
