Përditësuar/ Ora 9:00 – Qytetarët çajnë kordonin policor dhe bllokojnë aksin nacional
Qytetarët që po protestojnë te “pushimi i shoferit” në Lushnje, kanë çarë kordonët policore dhe janë vendosur në rrugë.
Protestuesit tashmë janë në rrugë dhe lëvizja e automjeteve është bllokuar.
***
Ora 8:30 – Rritja e çmimeve, protestë në Lushnje: Po na mbysni, po na detyroni të ikim, do mbetet vetëm Rama
Fermerë kanë dalë këtë mëngjes në protestë te zona e njohur si “pushimi i shoferit” në Lushnje.
Ata kërkojnë uljen e çmimeve, që ditët e fundit kanë shënuar një rritje të ndjeshme.
“Po na detyrojmë të ikëm, që këtu të rrijë vetëm Edi Rama”, u shpreh një prej qytetarëve.
“Na mbytën, për xhepat tona është katastrofë. Plehrat kimike kanë shkuar dyfish, nafta dyfish. Po su ulën çmimet, çantën në krah dhe të largohemi, një ortë e më parë”, tha një tjetër, i cili shtoi se protestat devijojnë derisa sa të ulen çmimet.
Protestuesit janë vendosur në dy anët e rrugës. Ndërkohë dy kordonë policore janë vendosur krah aksit, në mënyrë që protestuesit të mos bllokojnë rrugën.
Protesta ka pasur dy ditët e fundit në disa qytete të vendit, me qytetarët që kundërshtojnë rritjen e çmimeve. Protesta më të mëdha janë shënuar në kryeqytet, ku policia ka ndërhyrë me forcë për të shpërndarë protestuesit.
Qeveria nga ana tjetër, ende nuk miratuar ka një paketë ndihme për qytetarët.
