Lulzim Basha pritet të përballet nesër me grupin parlamentar, pjesa më e madhe e të cilit, i ka dalë kundër dhe kërkojnë largimin e tij, dhe nisjen e procesit të riorganizimit të PD-së, bazuar në një proces zgjedhjesh.
Deputetë të PD, të cilët deri më 6 mars ishin mbështetës të Bashës, ditët e fundit janë shfaqur publikisht kundër tij, duke i kërkuar të marrë përgjegjësitë për humbjen katastrofike në zgjedhjet e pjesshme vendore, ku nga 6 bashkitë ku u mbajtën zgjedhjet, sigla e PD, me të cilën kandidonin emrat e përzgjedhur nga Basha, u renditën të 3-ët.
Basha vetë ka deklaruar se është koha për reflektim, sikundër ka shtuar se është i gatshëm të marrë çdo vendim në të mirë të PD, por ka përjashtuar një dorëheqje.
Në të njëjtën linjë me Bashën ka qëndruar edhe Gazment Bardhi, i cili gjithashtu ka apeluar për reflektim, ndërsa është shprehur se nuk është koha për analiza.
Në anën tjetër, janë deputetët që i kërkojnë dorëheqjen që duket se nuk do të pranojnë që Basha të fitojë kohë përmes atij që e quan si “proces reflektimi”.
Sipas informacioneve, ky proces për shkarkimin e Bashës deputeti Tomor Alizoti ka propozuar firmosjen e një promemorieje, ku deputetët të mbajnë një qëndrim të prerë, nëse do të pranojnë ose jo të jenë pjesë e një grupi parlamentar me kryetar Bashën.
I pari që i kërkoi largimin e Bashës nga posti që mban, edhe pse Kuvendi i 11 dhjetorit 2021 dhe më pas referendumi i 18 dhjetorit 2021, e ka shkarkuar nga funksionet, ishte deputeti i Durrësit Ferdinand Xhaferraj. Ndërsa ligjvënësi demokrat i Shkodrës Helidon Bushati kërkoi një kuvend bashkimi mes demokratësh.
Përballë këtyre kritikëve, Basha ka në krah një pjesë të vogël të deputetëve, krerët e degëve por edhe kandidatët e 6 marsit. Një ditë më parë ai pranoi humbjen, por tha se marrja e përgjegjësive do të bëhet pas një procesi analize.
Grida Duma publikisht ka deklaruar se Basha ka humbur shansin me 6 mars, ndërsa ajo ka propozuar drejtimin e PD me një bord ose grup këshillimor, ku të përfshihen figura të spikatura të Komisionit të Rithemelimit ose Foltores, por edhe të PD së sotme, apo vulës sikundër konsiderohet nga kundërshtarët e Bashës.
