Deputeti socialist, Erion Braçe tha këtë të Enjte se në protestën e djeshme për rritjen e çmimeve kishte hajdutë dhe banditë rrugësh.
Braçe mbështeti uljen e çmimeve, ndërsa shtoi se shteti ka mekanizma për të ndërhyrë. Ai foli dhe për tregtarë spekulantë në vend.
“Unë jam kundër prekjes së taksave me presion rruge se politika fiskale s’bëhet në rrugë dhe mbi të gjitha transferimi i përgjegjësisë sociale nga shteti te tregtarët, për më tepër për tregtarë që abuzojnë, për mua është e papranueshme. Përgjegjësi sociale për shtresat në nevojë për të varfrit, për punëtorët, për bujqit për shtesën e mesme, pjesërisht duhet ta mbajë shteti. S’mund ta mbajnë tregtarët, për më tepër për tregtarë që abuzojnë apo janë integruar vertikalisht nga shumica deri te pakica”, tha ai.
I pyetur nga gazetarët nëse do u bashkohet protestave, ai tha që “jo”.
“Pashë njerëz nga sëra e politikanëve që mbajnë përgjegjësi shumë të rëndë për atë që ka ndodhur në tregun e hidrokarbureve dhe industrinë e naftës për vite me radhë. Ka aty njerëz që kanë dhënë kontribut domethënës në grabitjen e vendburimeve më të rëndësishme të naftës dhe të gazit në këtë vend. Ashtu siç pashë civilë që janë hajdutë banalë, ju i hapni dhe ekranet këtyre hajdutëve banalë dhe s’ju kërkoni asnjëherë ‘ore ku ke punuar ti’. Kanë punuar në sektorin publik si partiakë dhe tani bëjnë civilistin. Me këto unë s’kam lidhje fare. Dhe e fundit fare unë pashë banditë rrugësh. Banditë rrugësh me roleks nga 10 mijë euro në dorë e me xhupa nga 1 mijë euro të ngrohtë që dalin atje, marrin mikrofonin dhe që thërrasin ‘Shqipëri Entnike’”, tha Braçe.
