Deputeti Dashamir Shehi u shpreh mbrëmjen e sotme në emisionin A-Show se vendi ka nevojë për një opozitë që shqiptarët ta besojnë, që shqiptarët ta mbështesin, por për të arritur këtë duhet që ne ti kthejmë besimin.
Shehi tha se demokracia nuk bëhet vetëm në Parlament, por edhe me protesta. “Ka shkuar çmimi i naftës 269 lekë për litër, asnjë nuk lëviz me makinë me këto çmime, por asnjë nuk proteston. Shkon qeveria dhe na thotë do bëjmë tunelin e Llogarasë me 150 mln apo 200 mln, po kujt i duhet me këtë situatë ky tunel? Këto para duhet të investoheshin në ekonomi, të shkonin në ndihmë të bizneseve”, tha Shehi.
Ai tha se Lulzim Basha duhej të kishte dhënë dorëheqjen nga kryetar i PD që në datën 26 prill 2021.
“Isha i pari që thashë se zoti Basha duhej të largohej. Pse të largohej? Sepse ka humbur zgjedhjet. Në datën 26 prill duhet të ishte larguar vetë. Ky rrugëtimi i fundit sherrxhi që ka prodhuar një lloj drame brenda opozitës, vërtetë në datën 6 pati një fitore të Berishës, por është si e Pirros kjo, sepse raporti është 2:1. Ka fituar 2-shin ndaj 1-shit. Por të dyja grupet ishin 40% në zgjedhje, janë bërë 30-28% tani, po t’i heqim ca vota LSI-je. është rrudhur edhe më tej. Kjo tregon që procesi ka qenë vërtetë inovativ nga kjo pikëpamje, por është i dhimbshëm”, u shpreh Shehi.
