Kryeministri Edi Rama duket se ka ndryshuar qëndrim lidhur me rritjen e çmimeve në tregun shqiptar, jo vetëm të karburanteve, por edhe të shumë prej produkteve bazë, që konsiderohen si “të shportës”. E ndërsa pak ditë më parë deklaronte se ky ishte tregu dhe këto janë pasojat e luftës në Ukrainë, një pjesë të të cilave do i mbajnë në kurriz edhe shqiptarët, sot Rama ka njoftuar ngritjen e një Komiteti të Posaçëm ndërministror për përballimin e pasojave që po sjell lufta e Rusisë me Ukrainën.
Rama u shpreh se Shqipëria nuk po preket nga kërcënimi i luftës, por nga kërcënimi ekonomik që po sjell pushtimi i Ukrainës nga Rusia.
Sipas Ramës, çmimi i naftës nuk varet nga qeveria por nga tregu dhe sipas tij është super i ndjeshëm ndaj të gjitha krizave dhe sidomos ndaj një lufte.
“Po krijojmë një komitet të posaçëm ndërministror për përballimin e pasojave të luftës. Ne nuk jemi në kushte e një kërcënimi ushtarak por si të gjitha vendet e tjera të NATO-s edhe më gjerë, për kërcënimin ekonomik, pas daljes nga binarët të normalitetit të kostove për mallrat e konsumit”, tha Rama.
Ai tha se gjithashtu kërcënimi i thellimit të krizës energjetike vjen vetëm duke u rritur.
“Duhet të përgatitemi edhe për situata shkurtimesh dramatike të furnizimeve me energji apo me naftë. Edhe kjo mund të vijë edhe pse ky është skenari më dramatik. Sepse zëvendësimi i burimeve që janë burime që siguroheshin nga Rusia është jashtëzakonisht i komplikuar.
Detyrimi për të qëndruar në front në mbështetje të Ukrainës është e pashmangshme. Dhe do bëjmë çmos për të mos shkojmë në sakrifica reale, por ka një qëllim, të mbrojmë jetën dhe shëndetin.
Atë që është më e rëndësishmja të mbrojmë Shqipërinë nga përshkallëzimi i agresionit, si pjesë e vendeve që po bëjnë përpjekje. Sa na takon ne, do bëjmë çmos të mbrojmë njerëzit tanë.
Nuk është një film, por një luftë reale siç e kemi parë edhe në luftën e dytë botërore apo në Kosovë për përpjekjen për spastrim etnik. Lufta atje mund të përshkallëzojë edhe jashtë edhe brenda kufijve të NATO-s”, tha Rama.
