Ka një parim në botën e kumarit, që thotë se “mirë është të tërhiqesh për sa kohë je fitim”. Po e teprove duke e sfiduar fatin, humbja nuk do të vonojë.
Në gjendje humbjeje është sot edhe ambasadorja Juri Kim, e cila nuk e ndali në kohë lojën për Lulzim Bashën dhe tani po bën llogaritë me bastin e humbur të 6 Marsit, për të cilin nxitoi të investohej pa u menduar gjatë.
Ishte kulmi i fushatës zgjedhore, kur votuesve të Shkodrës, Dibrës, Vorës, Durrësit, Rrogozhinës dhe Lushnjes, përveç tre kandidatëve për bashkitë, u foli edhe ambasadorja amerikane.
Juri Kim tentoi t’i orientojë votat e popullit të opozitës drejt Lulzim Bashës, duke kujtuar “non grata”-t nga SHBA dhe duke shigjetuar Sali Berishën.
“Pyetje për kandidatët: Nëse sponsori juaj kryesor është dikush i caktuar nga SHBA për korrupsion domethënës, çfarë saktësisht po u premtoni votuesve? Kush do t’ju drejtojë nëse fitoni dhe çfarë do t’i detyroheni atyre? Çfarë duhet të presin shqiptarët? Çfarë duhet të presin SHBA?”, shkruajti ambasadorja në datën 21 shkurt.
Nuk ishte hera e parë që Juri Kim investohej pro-bashistëve. Më parë u kishte folur demokratëve me tone kërcënuese, se do të hanin bar, nëse e mbanin Berishën në gjirin e tyre; më pas ua kishte bërë të qartë se SHBA nuk do të kishte marrëdhënie me një parti të drejtuar nga “non grata”.
Por ndryshe nga e shkuara, mesazhi i 21 shkurtit u konsiderua një ndërhyrje e drejtpërdrejtë në fushatën e zgjedhjeve, një veprim i pazakontë për një ambasador dhe një bast i humbur për këdo që e njeh politikën në Shqipëri.
Rezultati tregoi se ambasadorja duhet të ishte ndalur te pezullimi i Berishës nga grupi parlamentar apo tek makinacionet për t’i lënë Lulzim Bashës selinë e PD-së. Rreshtimi krah Bashës në zgjedhje ishte e gabuar dhe përgjigjia që i dhanë votuesit, tregoi se çfarë ndikimi të papërfillshëm kanë tek votuesit deklaratat e ambasadores amerikane.
Tani që 6 Marsi e nxori PD e Bashës forcë të tretë, për bastin e ambasadores mund të shërbejë një rregull tjetër, që thotë se “gabimi më i madh në kumar, është kur nuk e kupton se humbja nuk po të vjen nga fati i keq, por nga loja e keqe”./LAPSI
