Bardh Spahia, kandidat i koalicionit “Shtëpia e Lirisë” është fitues i zgjedhjeve në Bashkinë e Shkodrës, me një diferencë prej rreth 2 mijë votash nga kandidatja e PS-së, Majlinda Angoni.
Përfundimi i numërimit të 250 kutive në Shkodër është shoqëruar me ovacione nga disa dhjetra demokratë të pranishëm në mjediset e KZAZ, atje ku edhe po numëroheshin kutitë e fundit, ndërsa video e mëposhtme tregon momentet e para të gëzimit të demokratëve.
“Bardhi, Bardhi, Berisha, Berisha”, janë ovacionet e para të mbështetësve të “Shtëpisë së Lirisë”, e cila nga zgjedhjet e 6 marsit fitoi Bashkinë e Shkodrës, ndërsa u rendit e dyta në Durrës, Vorë, Peshkopi, Lushnje, ndërsa në Rrogozhinë e 3-ta.
Kandidatët e mbështetur nga ish-Kryeministri Sali Berisha kanë arritur të marrin disa fish vota më shumë se ata të kandiduar nga Lulzim Basha, i cili në zgjedhjet e djeshme në 6 bashkitë ishte në siglën e PD.
Kjo është hera e parë në 31 vitet e pluralizmit, që PD si sigël del e treta në një proces zgjedhor.
