Zyrtarisht në orën 19:00 është mbyllur procesi i votimit për zgjedhjen e kryetarit në 6 bashki të vendit.
Materialet e kutive të votimit do të shoqërohen nga qendrat e votimit drejt KZAZ, ku ndodhen edhe vendnumërimet e votave nga komisionerët dhe efektivët e policisë.
Pjesëmarrja në votime në të 6 bashkitë llogaritet në rreth 30-35 %, ndërkohë që përqindjen më të lartë e ka Bashkia Dibër me mbi 43 %.
Sipas raportimeve në KQZ, pjesëmarrja e votuesve deri në orën 19:00, orë kur u mbyll edhe procesi i votimit është 30.30%
Pas Dibrës për pjessëmarrje votuesish renditet Vora me 38.47%, Lushnja me 35.96%, Rrogozhina me 30.92%, Shkodra me 29.11% dhe në fund renditet Durrësi me 26.4%.
Në tri qendra votimi në Shkodër u shpall pavlefshmëria për shkak se për mbi 5 orë nuk ka pasur votues. Kjo gjendje është shkaktuar për shkak të motit të keq, temperaturave të ulëta dhe borës, duke bërë të pamundur që banorët të marrin pjesë në votime.
