Avokati, Spartak Ngjela ka komentuar zgjedhjet e pjesshme lokale, të cilat u mbajtën ditën e sotme për të zgjedhur krerët e 6 bashkive të vendit.
Duke folur për pjesëmarrjen e ulët në Shkodër, Ngjela tha në Faxnews se ky kishte qenë një plan i socialistëve të cilët sipas tij nuk donin të fitonin pasi kryeministri Edi Rama mbështeste ish kryeministrin Sali Berisha.
Lidhur me rezultatin e zgjedhjeve në Vorë ku fitues u shpall kandidati i PS me numrin më të lartë të votave, avokati tha se kjo ishte një shenjë e keqe për PD-në zyrtare dhe shtoi se duhet të kishte një lloj retorike të mbajtjes së përgjegjësisë nga ana e kryedemokratit Basha.
“Ka diçka, në zgjedhje nuk kanë dalë as socialistët në Shkodër, sepse nuk duan të fitojnë. Kanë dashur të fitojë Saliu se Rama është me Saliun. Por ajo 20 e ca përqind që thonë këta, ajo nuk i jep fitoren madje mund të jenë pavlerë. Atje zgjedhjet duhet të jenë pa vlerë nëse janë më pak se 50% e pjesëmarrësve që kanë votuar. Për këtë duhet të ketë një qëndrim se kam parë një përqindje shumë të ulët në pjesëmarrje se ashtu degradohet procesi i votimit. Do të thotë se njerëzit nuk pranojnë asnjërin prej krahëve”, tha Ngjela.
Rezultati në Vorë, ku u shpall fitues kandidati i PS, Blerim Shera, si e shikoni këtë situatë?
Ngjela: Shenjat janë që partia Klasike nuk është mirë. Megjithatë Vora nuk ka shumë lidhje me elektoratin tjetër. Është specifikë e veçantë Vora sepse ka interesa të ngushta brenda, megjithatë, nuk është shenjë e mirë për PD-në klasike.Opozita nuk është problem në kuptimin e keq të fjalës, por është në krizë, një krizë të cilën e ka krijuar Saliu.
A mund të pritet një dorëheqje nga Basha, ose të paktën një retorikë pranuese e rezultatit të zgjedhjeve?
Ngjela: Duhet ta presim diçka të tillë, ç’na gjeti ne për 2 ditë. Do kuptojmë sesi do flasin palët dhe më pas do bëjmë interpretimin. Shkodra dhe Durrësi janë teste për zgjedhjet e ardhshme. Në Shkodër, do ketë krizë, ua thashë arsyen përse. Nëse do kishin marrë pjesë socialistët do ishte ndryshe. Nëse ky dyshimi im në Shkodër rezulton i vërtetë, kjo është për të vënë duart në kokë. Rama e do Berishën se nuk ka vota. Nuk fiton kurrë PD me Berishën. Bashës i kanë përçarë partinë, le ta hiqnin por brenda strukturave jo me urdhërin e Saliut. Ky është turp kombëtar more, të dalë përballë Amerikës tani sepse është shpallur non-grata.
