Këtë të Shtunë, çmimi i naftës kapi rekord në vend,duke u tregtuar me 230 lekë për litër në pikat e furnizimit me pakicë të automjeteve. Ndërkohë, në rrjetet sociale është kthyer në virale një video ku deputeti socialist Erion Braçe premtonte naftë pa akcizë në fushatën e 2013-ës, që pasoi me fitoren e zgjedhjeve të PS-së.
Në videon e publikuar, Braçe shprehet: “Dua t’iu pyes: A e doni naftën pa akcizë apo jo? A i doni plehrat kimike pa tatim mbi vlerën e shtuar? A i doni ushqimet tuaja pa tatim mbi vlerën e shtuar, apo jo? A e doni energjinë elektrike pa tatim mbi vlerën e shtuar, apo jo? Nëse i doni të gjithë klëto votoni Partinë Socialiste dhe Edi Ramën”.
Video është shpërndarë edhe nga ish-kryeministri Sali Berisha, i cili me ironi shkruan: Kur i besonte Edvinit! Flet vet!
Opozita dhe ekspertët kanë deklaruar se taksat mbi naftën në vend janë një barrë që çon tregtimin e saj me çmime të kripura te konsumatorët. Aktualisht taksat mbi naftën vlerësohet se arrijnë në 120-130 lekë për litër. Ekspertët argumentojnë se qeveria duhet të ndërhyjë për të ulur ngarkesën fiskale, si e vetmja mënyrë për të amortizuar deri diku rritjen e çmimit.
Nga ana tjetër, shtrenjtimi i karburanteve pritet të ndikojë në rritjen e çmimeve të mallrave dhe produkteve të tjerë, duke dhënë impakt të drejtpërdrejtë në shumë sektorë, ku më të prekurit pritet të jenë transporti dhe prodhimi. Në një reaksion zinxhir efektesh, kjo do të çojë në shtrenjtimin e kostos së jetesës për qytetarët.
Ndërkohë, çmimet e disa produkteve ushqimore tanimë kanë nisur të rriten, duke rënduar xhepat e qytetarëve.
