Ish-Kryeministri Sali Berisha, i cili sot zhvilloi takimin e mbylljes së fushatës elektorale në Bashkinë
e Shkodrës, akuzoi Kryeministrin Edi Rama se e urren Shkodrën dhe shkodranët, ndaj këtë bashki e ka lënë pa investime.
Por në një tjetër takim elektoral, po në kuadrin e fushatës, Edi Rama justifikohej se Shkodra është lënë në harresë jo nga Qeveria, por nga Bashkia, e cila drejtohet nga demokratët. Pra Kryeministri të gjithë përgjegjësinë ia ka hedhur Voltana Ademit, kryebashkiakes së Shkodrës, e cila ishte e zgjedhur në 2015 dhe prej 7 vitesh drejtoi këtë bashki.
“Kemi bërë çfarë kemi mundur se ishte përpjekja jonë. Madje, shpesh edhe në kundërshtim me rezistencën e pakuptimtë politike të bashkisë, që u bë stadiumi i ri i Shkodrës, që u rindërtua dhe u restaurua Teatri, që u ndërtua Muzeu i ri Kombëtar i Fotografisë, apo që u bë rruga që lidh Shkodrën me Velipojën.
E vetmja bashki që nuk ecën është bashkia e Shkodrës. Bashkia e Shkodrës ka bërë gjithmonë të njëjtën zgjedhje dhe ka marrë gjithmonë të njëjtin rezultat kur vjen puna tek jeta e përdtishme. Një rezultat që në mos qoftë zero, është mizerabël në krahasim me shumë bashki të tjera të Shqipërisë”, deklaroi Rama
