Vetëm 2 ditë para zgjedhjeve të 6 marsit, kreu i KQZ, Ilirjan Celibashi ka folur për procesin e votimit elektronik në Vorë duke thënë se procesi do të testohet pasditen e sotme. Ndërsa për këdo që kryen shkelje duke u përfshirë në shitblerje vote apo ndikim qytetarësh, Celibashi tha se do të ballafaqohen me organet e drejtësisë.
Ai tha se në Vorë rezultati del brenda ditës, ndërsa në bashkitë e tjera premtoi rezultatin e zgjedhjeve brenda 48 orëve.
“Në Vorë synohet që rezultati paraprak të shpallet sapo të mbyllet procesi i votimit. Jo më vonë se ora 20:00. Brenda mbrëmjes së datës 6 Mars. Sa i takon nxjerrjes së rezultatit në bashkitë e tjera i kemi marrë të gjitha masat nga ana logjistike dhe nuk besoj se do kemi probleme për të shpallur rezultatin jo më vonë se 48 orë nga mbyllja e votimit. Ndoshta edhe më shpejt. Sepse kemi një numër të kufizuar kandidatësh dhe nuk implikon më shumë se kërkon ligji”, tha Celibashi.
“Do të marrim të gjitha masat që të mos kemi probleme për administrimin e procesit zgjedhor. Për procesin e votimit elektronik në Vorë, sot në orën 14:00, KQZ do të testojë procesin. Dua të rikonfirmoj që jo vetëm bazuar në eksperiencën e zgjedhjeve të tilla në KZAZ nr.40 në Tiranë, në tërësi është proces që garanton siguri dhe nuk ka asnjë shkak apo pretekst për ta vënë në diskutim këtë proces. I ftoj qytetarët e Vorës të marrin pjesë në votime. Thirrja vjen për votuesit e të gjithë bashkive të tjera për të marrë pjesë në votime”, tha Celibashi mes të tjerash.
Për disa fenomene që janë konsideruar dhe kriminale në zgjedhjet e tjera, kushdo që do të përfshihet në procesin e shitblerjes së votës aspo të ndikimit të qytetarëve, do të ketë pasoja dhe nuk më vjen mirë ta sjell në vëmendje qoftë dhe prej natyrës time, por një pjesë jo e vogël e atyre rasteve e personave që KQZ i ka evidentuar janë duke u ballafaquar me organet e drejtësisë. Mirëkuptim për të gjithë se nuk është kërcënuese por nëse dikush e ka guximin të ketë ballafaqim me organet e drejtësisë, mundet ta bëjë dhe këtë. Të gjithë ata që evidentojnë shkelje të tilla, ti denoncojnë në organet e ndjekjes penale”, shtoi ai.
Pyetur nga gazetarët nëse janë hasur parregullsi ose denoncime në lidhje me shitblerjen e votës, Celibashi ceku dy denoncime të Partisë Demokratike për Durrësin dhe Rrogozhinën për të cilat deklaroi se ka nisur një hetim administrativ. “Deri më tani nuk ka pasur në KQZ shqetësime për shit blerje vote. Ka pasur një denoncim nga PD për administratën publike për dy raste. KQZ ka nisur një hetim administrativ për Durrësin dhe Rrogozhinën. Kanë ardhur përgjigjet dhe po bëjmë verifikimet”, u shpreh Celibashi.
Ai shtoi se partitë politike kanë përgjegjësi për procesin zgjedhor dhe pret prej tyre që demonstrojnë këtë përgjegjësi. “Nuk kam pasur mundësi ta ndjek fushatën zgjedhore. Ne kemi monitoruesit në terren dhe nga raportimet që ne kemi, nuk janë evidentuar raste që fushata të jetë jashtë parashikimeve të ligjit. Nuk ka pasur ndonjë gjë shqetësuese deri tani. Gjërat deri tani kanë shkuar qetë por ajo që ka më shumë interes është se nesër dhe pasnesër partitë kanë përgjegjësi për procesin zgjedhor. Kjo është kryesore. Ta demonstrojnë atë në përputhje që kanë me atë proces. Këtë thirrje shpresojnë të dëgjojnë shumë mirë”, deklaroi ai.
