Pas Lushnjes, ish-Kryeministri Sali Berisha ka marrë pjesë në mitingun përmbyllës të fushatës për zgjedhjet e 6 marsit, të kandidatit të “Shtëpisë së Lirisë”, Ardian Muka, i cili garon për kryebashkiak të Durrësit.
Deputeti Oerd Bylykbashi duke iu drejtuar të pranishmëve, tha se me 6 mars qytetarët durrsakë duhet të ndëshkojnë me votë arrogancën, që e ka kthyer Durrësin në një qytet ku bëhet gjithmonë e më e vështirë për të jetuar. ai tha se në 22 vitet e drejtimit të Bashkisë nga socialistët janë vjedhur me qindra miliona euro, ndërsa këtu betonizohet gjithçka.
“Miliarda lekë u hodhën për Velierën, u vodhën edhe fondet e tërmetit, të cilat i përdorën për të blerë votat në zgjedhjet e 25 prillit”, tha Bylykbashi. Sipas tij, me 6 mars durrsakët do të ndëshkojnë me votë arrogancën dhe ata që ju kanë mbyllur dyert dhe ju kanë keqqeverisur.
Bylykbashi tha se Ardian Muka përfaqëson opozitën e vërtetë, pasi kandidati tjetër i Lulzim Bashës, përfaqëson pazaret me Edi Ramën.
