Teksa lufta ka hyrë në ditën e saj të tetë, presidenti francez Emmanuel Macron ka zhvillua një bisedë telefonike me homologun e tij rus Vladimir Putin. Fill pas bisedës me liderin rus, Macron ka kryer një telefonatë edhe me presidentin ukrainas Volodymyr Zelensky.
Ky fakt është konfirmuar nga burime nga pallati i Elysee. Ndërkohë, bisedën telefonike me Putin e konfirmoi edhe ministri i Jashtëm rus, Lavrov.
Biseda me presidentin rus raportohet se zgjati 1 orë e 30 minuta. Kjo ishte biseda e tretë mes presidentëve të Rusisë dhe Francës që kur ushtria ruse pushtoi Ukrainën më 24 shkurt.
Në një fjalim drejtuar francezëve një ditë më parë, Macron tha se donte të vazhdonte të mbante kontakte me Kremlinin dhe kështu të përpiqej të ndalonte luftën.
Ministri i Jashtëm francez Jean-Yves Le Drian ka sugjeruar se në luftën kundër Ukrainës, Rusia do të vazhdojë të përpiqet ta rrethojë pasi nuk ka arritur të realizojë qëllimet e saj për një ofensivë rrufe.
