Kandidati për bashkinë Shkodër Xhemal Bushati zhvilloi një takim në lagjen 4 në qytet.
Banorët e atij rajoni u shprehën se bashkia Shkodër i ka lënë në harresë për shkak se kanë munguar investimet. Bushati u shpreh se lagja do të marrë vëmendjen e merituar duke nisur që nga hyrja e qytetit.
“Më përgjegjësi kthejmë vëmendjen në lagjet e Shkodrës. Infrastruktura, mungesa e shërbimeve por edhe dyert e mbyllura janë disa prej shqetësimeve që kanë banorët e lagjes 4”, tha ai. Xhemal Bushati u premtoi banorëve të kësaj lagje se do të ndajnë së bashku sfidat për një Shkodër më të zhvilluar nesër.
“Me banorët e Rajonit 4 ndaj momente të veçanta. Është lagja ku linda dhe jetova një jetë. Kemi ndarë halle dhe kujtime të bukura. E sot, me shkodranët e mi, po ndajmë një tjetër sfidë. Ndryshimin e Shkodrës për të cilin jemi zotuar dhe do e nisim me 6 Mars. Ata më njohin mirë. Nuk jam nga ata që është larguar edhe në ditët më të vështira të Shkodrës, dhe nuk po e bëj as sot. Sepse ndryshe nga ata që veç marrin, ne jemi këtu për të marrë përgjegjësi. Përgjegjësinë e Ndryshimit të Shkodrës”, tha ai.
