Aktorja tajlandeze Nida Parcharaeraphong ka rënë tragjikisht nga një varkë me të cilën po shëtiste me miqtë e saj. Si pasojë e rënies, aktorja e njohur humbi jetën në moshën 37-vjeçare.
Nida ishte duke shkuar me varkë në një restorant në lumin Chao Phraya në Bangkok. Ajo raportohej se ishte parë e ulur në pjesën e pasme të barkës, por rrethanat e rënies tragjike mbetën ende të paqarta. Pasi varka ku ajo ndodhej u kthye përmbys, miqtë e saj vendosën të thërrisnin autoritetet, të cilët dërguan një grup prej 30 zhytësish në zonë.
Vëllai i aktores, Dais Dejjab iu bashkua ekipit të shpëtimit dhe pikasi diçka në ujë, që më vonë u identifikua si trupi i Nidës.
“Dhimbja që ndjejnë të gjithë në familje është e padurueshme. Ne e donim aq shumë motrën tonë që na kishte sjellë aq lumturi. Dua të falënderoj të gjithë për përpjekjet e tyre, unë erdha tani që ta çojmë atë në shtëpi”- tha Dejjab.
Panda Siriyuthyothin, nëna e Nidas, tha e shtangur se e bija ishte një notare e mirë dhe se nuk e besonte dot atë që kishte ndodhur.
“Natën para se ajo të zhdukej, mendoja për të, desha t’i telefonoja. Kur dëgjova lajmin nuk mund t’i besoja, përsëri shpresoja të mos ishte ajo”– u shpreh nëna e aktores.
Doktorët që kryen autopsinë e saj, konfirmuan se ajo kishte vdekur nga mbytja, si dhe zbuluan një çarje të thellë në këmbën e majtë që mund të jetë shkaktuar nga barka ose nga helika e saj.
Kreu i policisë së Nonthaburi, tha se pronari i varkës do të përballet me akuza të rënda pasi varka kishte licencë operimi të skaduar.
“Ne zbuluam se varka kishte licencë të skaduar operimi dhe se personi që po e drejtonte në momentin që ra Nida, nuk kishte licencë për ta bërë këtë. Të dy ata mund të përballen me akuza vrasjeje nga neglizhenca por ende nuk janë ngritur akuzat zyrtare”– u shpreh kreu i policisë.
