Deri sot kemi parë sportistë ukrainas, të famshëm që kanë marrë armët në duar për të mbrojtur Ukrainën nga invazioni rus. Edhe sportistë rusë të famshëm janë distancuar ose të paktën nuk kanë marrë qëndrim as pro e as kundër, në mënyrë të hapur dhe këtu flasim për futbollistë tenistë dhe shumë të tjerë me emër në botën e sportit.
Por sot kemi ndoshta rastin e parë të një sportisti rus, me emër duhet thënë që mban anën e Putin ose të luftës në Ukrainë.
Po flasim për Alexander Povetkin, ish boksierin rus, ish kampion bote në versionin WBA për peshat e rënda i cili me një postim ka ndezur rrjetet sociale. Ai shprehet hapur duke mbështetur sulmin ndaj Ukrainës e ku sipas tij po luftohet nazizmi.
“Ka fuqi tek e vërteta…Kjo frazë e famshme sot pasqyron thelbin e asaj që po ndodh në Ukrainë. Ne luftuam për të vërtetën gjatë gjithë këtyre viteve, ndërsa sllavët po shfaroseshin në Donbass. Kjo është arsyeja pse unë jam anëtar dhe jam me vendimin e tyre për të dalë në mbrojtje të njerëzve të thjeshtë, për të luftuar nazizmin, që paraziton në kurriz të të gjithësecilit. Çdo luftë ka një fund. Le të shpresojmë që edhe kjo të përfundojë në ditët në vijim”, ishte postimi i ish boksierit të famshëm që mbron hapur sulmin ndaj Ukrainës.
Shumë reagime ka patur ndaj tij, disa pro e disa kundër por që tregon edhe njëherë se vendimet e Putin kanë mbështetje edhe te rusët.
