Me 6 mars mbahen zgjedhjet e pjesshme vendore në 6 bashki, Shkodër, Dibër, Durrës, Vorë, Rrogozhinë dhe Lushnje, ku mbi 700 mijë qytetarë që kanë emrin në listat e zgjedhësve, do të votojnë për kryebashkiakët.
E ndërsa pritet që në Bashkinë e Vorës të aplikohet votimi dhe numërimi elektronik, nga Shkodra vjen alarmi mbi problemet që mund të rrezikojnë procesin.
Kryetari i KZAZ, Sahdi Neza rendit disa nga problematikat, veçanërisht për qendra votimi që ndodhen në zonat e thella apo të largëta.
“KAZAZ 2 është më e madhja pasi përfshin 109 qendra votimi. Qendrat e votimit të Dukagjint, Shoshit, Pultit i duhen 4-5 orë për me transportu bazën materiale. edhe faktorët natyrorë në fakt nuk janë shumë të përshtatshëm në këtë situatë”, tha Neza.
Përdorimi i elektronikës, për identifikimin e zgjedhësve mund të pamundësohet nga mungesa e energjisë elektrike
“Sipas informacioneve që kemi zona e Dukagjinit nuk ka drita. Edhe nuk e di nëse do të funksionojë. Do pyesim në bashki si do bëhet votimi”, tha ai.
Të dhënat e KQZ raportojnë për rreth 170 mijë qytetarë me të drejte vote, teksa në garë janë Majlinda Angoni e PS, Xhemal Bushati i PD dhe Bardh Spahia i koalicionit “Shtëpia e Lirisë”.
