Gjatë muajit janar dhe shkurt të këtij viti, numri i aksidenteve rrugore në të gjithë vendin ka qenë në rritje, krahasuar me të njëjtën periudhë të një viti më parë.
Gjithsej janë shënuar 217 aksidente rrugore, 13 më shumë se dy muajt e parë të vitit të kaluar. Numri i viktimave të shkaktuar nga këto aksidente ka ardhur në rënie. Në muajt janar e shkurt të 2022 kanë ndërruar jetë 32 persona, 8 më pak se vitin e shkuar.
Referuar të dhënave zyrtare të policisë, në 217 aksidente 26 persona janë plagosur rëndë dhe 237 të tjerë kanë marrë plagë më të lehta. Në pjesën më të madhe të ngjarjeve, shkak i aksidentit ka qenë sjellja e drejtuesit të mjetit. Kryesisht, aksidentet janë kryer nga grup-mosha 25–34 vjeç.
Gjatë dy muajve të parë të 2022-it, janë vendosur në total 113.904 gjoba, si dhe janë pezulluar 2.999 leje drejtimi. 536 shoferë janë arrestuar në flagrancë, nga të cilët 324 në gjendje të dehur dhe 212 pa leje drejtimi.
