Gazetari i BIRN, Besar Likmeta, deklaroi këtë mbrëmje në emisionin ‘A Show’ me gazetarin Adi Krasta në Syri Tv, se vazhdojnë të investigojnë në lidhje me inceneratorët ndërsa theksoi se nuk kanë parë një punë konkrete nga ana e drejtësisë.
Likmeta u shpreh se një pjesë e kompanive që janë përfshirë në aferën e inceneratorëve, janë të regjistruara në juridiksione offshore dhe abuzimi me inceneratorët mund të jetë më shumë se 430 milionë euro, dhe kjo qeverinë e frikëson.
“Inceneratori i Tiranës ka kompaninë mëmë në Holandë. Mirel Mërtiri është misterioz dhe ka bërë të pamundur për të mos dalë në sipërfaqen e publikut. Është i lidhur me gjithë kompanitë që kanë përfituar tre kontrata koncesionare, ose përmes partneres së tij Stela Gugallja ose partnerit të biznesit, Klodian Zoto. Paratë tona ai preferon t’i marrë.”-tha Likmeta.
Gazetari tha se është skeptik nëse do zbardhet afera e inceneratorëve. Ndër të tjera Likmeta theksoi se drejtësia nuk e ka bërë punën e saj, në mënyrë të qëllimshme.
“I bëjmë faktet publike ne gazetarët. Mënyra si një gazetar ftohet në komision, është si ekspert. Rama bëri një sherrnajë aty. S’kemi parë një punë të thelluar. Drejtësia ka bërë një sy qorr dhe një vesh shurdh. Nuk ka një vullnet nga prokurorët, më vjen keq, për një kontratë financiare qindra milionë, do ishte në linjën e shpërdorimit të detyrës.”-tha Likmeta.
Lidhur me çështjen e inceneratorëve, Besar Likmeta tha se qeveria shqiptare jo vetëm në këtë rast, por dhe në të tjera nuk është shumë e dashur me kërkesat për të drejtën e informimit kur gazetarët duan të investigojnë dhe kërkojnë informacion.
“Të mohuarit e të drejtave nuk i bën gazetarët më pak të vendosur. Nuk e shoh gazetarinë si diçka që thur lavde, por që prodhon fakte. Të përdorim burime njerëzore, fakte. Për t’ja paraqitur publikut lehtësisht të kuptueshme, për ato që ndodhin rreth tyre. Si harxhohen paratë e tyre, si shpenzohen. Edhe nëse shikohet si goditje, mendoj se është i gabuar si perceptim. Gazetaria është për t’i dhënë zë qytetarëve.”-tha Likmeta.
Për gazetarin e BIRN, Besar Likmeta, shuma e aferës korruptive të inceneratorëve mund të jetë më shumë se 430 milionë euro, dhe kjo gjë qeverinë e shqetëson.
“Gazetarët duhet të ndjekin procedura dhe të ngrejnë shqetësime për sjelljen e qeverisë, por jemi për të mbrojtur interesin publik. Shkelja e procedurave bëhet që të zhduken këto para.”-tha Likmeta.
Ndër të tjera, Likmeta tha se ka disa arsye për të qenë skeptikë.
“Qytetarët janë të zhgënjyer se si aktorët publikë, gazetarët, apo të tjerë, një elitë që është e korruptuar, dhe jo gjithmojnë mbrojnë interesin publik. Gazetarët edhe mbyllin sytë nga frika, ka shumë gjëra. Është e ndershme kur ata janë skeptikë ndaj nesh.”-tha Likmeta.
