Shazi Ahmetaj, 23 vjeç dhe Mateo Kiptiu 30-vjeç janë lënë sot në burg nga Gjykata e Vlorës, pasi akuzohen se kanë vrarë ish-ushtarakun Altin Alikaj, ngjarje e ndodhur më 19 shkurt të këtij viti. Të dy mbërritën në Gjykatën e Vlorës në forca të shumta sigurie.
Ishte prokuroria ajo që kërkoi masën e sigurisë ‘arrest me burg’ për dy të prangosurit gjë që u miratua nga Gjykata. Përpara togave të zeza, të dy të rinjtë mohuan të kenë marrë pjesë në ngjarje. Por, pavarësisht dëshmisë së tyre, trupa gjykuese vendosi t’i lërë në burg.
Si ndodhi ngjarja?
Ngjarja u regjistrua në lagjen “24 Maji”. Ishte nëna e Alikajt ajo që pas disa ditësh kërkime gjeti të birin e pajetë në shtëpi dhe lajmëroi policinë. Alikaj ishte shpallur në kërkim që prej datës 11 shkurt. Zyrtarisht ai rezultonte në Kosovë ku kishte kaluar kufirin në mënyrë të rregullt, por në Shqipëri ishte kthyer ilegalisht. Ishte pikërisht kjo gjë që nuk i shtyu autoritetet të kërkonin në shtëpinë e Alikajt.
Vrasja ishte e mirëorganizuar. Fillimisht autorët kanë helmuar qentë e komshinjve, në mënyrë që të mos lehnin për të sinjalizuar futjen e tyre në banesë, kanë ulur automatin në shtëpinë e viktimës dhe më pas e kanë vrarë.
