Lulzim Basha, gjatë një takimi në degën nr 12 të PD në Tiranë, u shpreh se është i vendosur të çmontojë sistemin e korruptuar në Edi Ramës.
Basha tha se edhe hetimi i SPAK për inceneratorët erdhi pas presionit të PD lidhur me aferën prej 430 mln dollarë që i janë vjedhur shqiptarëve.
Sipas tij, përballë kësaj politike, ndodhen ata që shpifin dhe hedhin baltë.
“Ia faktuam Edi Ramës në Komisionin Hetimor vjedhjen prej 430 mln dollarësh të inceneratorëve. Çfarë bëri ai, hodhi baltë dhe shpifje ndaj nesh. Iu bashkuan edhe ata 3 të tjerët, bashkëpunëtorët e tij, dhe hodhën baltë mbi mua personalisht, Jorida Tabakut si kryetare e Komisionit dhe deputeteve të tjera. Pse e bënë? Ta harrojnë se mund të na bëjnë presion”, tha Basha.
Sipas tij, sot dy nga ministrat e Edi Ramës ndodhen në burg. “Saimir Tahiri i dënuar për kanabizimin, e kemi denoncuar që në ditën e parë, ndërsa Lefter Koka, për inceneratorët, edhe pse ai është bisht dhe jo koka e aferës”, tha Basha.
Ai akuzoi Edi Ramën se ka vjedhur votat, ka vjedhur demokracinë. “Duhet të shkojë jo para SPAK, por para jurisë së madhe, para popullit”, tha Basha.
Ai foli në vijim për dy nga reformat e mëdha, që sipas tij, janë ajo zgjedhore dhe ajo e decentralizimit.
“Komisioni Hetimor për inceneratorët ka dhënë rezultatet e para, do i shikoni që nesër, do merrni vesh se Edi Rama qëndron pas kësaj afere. Si ka mundësi që i vidhkan Edi Ramës 430 mln pas shpine? Pronari i inceneratorit të Elbasanit, që ka shkuar edhe në restorantin e Kryeministrisë, anëtar i bandës së Lushnjes, është i njëjti që ka inceneratorin e Tiranës, ndërsa në Fier ka angazhuar një punonjësen e tij. Çfarë thotë Edi Rama? Nuk e mbaj mend a e kam takuar, nuk e di kush i ka marrë 430 mln, ky që e di edhe kush e vjedh një lopë, nuk di se kush vidhka 430 mln”, tha Basha.
Ai sulmoi edhe ish-Kryeministrin Sali Berisha, kur tha se për hallin e tij të “non grata” na kundërvihet ne demokratëve dhe po shërben si tub oksigjeni të Edi Ramës.
Basha tha se një grusht njerëzish kanë mjelë PD-në, e kanë parë PD si çifligun e tyre, ndërsa ne jemi shumica që e shohim PD si shpresën e shqiptarëve.
