Trajneri i Partizanit, Dritan Mehmeti, mendon se loja e të kuqve ka problem vetëm fazën sulmuese, pasi në pjesën tjetër ekipi është konsoliduar me reparte. Pas barazimit 0-0 me Dinamon, ai tha për “SuperSport” se skuadra kishte bërë thuajse gjithçka mirë.
“Vazhdojmë e vuajmë pjesën e sinkronizimit dhe sidomos qetësisë para portës, Kemi pasur 2-3 momente që edhe mënyrën si mënyrën si duam ta realizojmë golin e godasim portën, nxitohemi. Kemi qenë në 2-3 momente me Skukën, Malën e Kallakun ku mund të godisnin më mirë. Janë situata që në futboll duhet t’i zgjidhësh me qetësi e durim se sa kalojnë minutat kur kërkon fitoren, skuadra çbilancohet e kërkon në mënyrë jo të duhur që të shkojë te goli në mënyrë jo të rrjedhshme.
Skuadra ka qenë e motivuar në aspektin maksimal. Megjithatë, çdo ndeshje ka historinë e vet, nëse e ke mundur dikë, nuk do të thotë që sot e ke te lehtë. Kemi punuar, por vuajmë shumë se kemi pasur raste më të pastra para portës dhe nëse nuk e zgjidh, nis ngërçi psikologjik që e bën të vështirë pastaj.
Kundërshtari ishte vendosur me shumë forca mbrapa. Në shumë situata u mundova të vertikalizoja me Kallakun e Malën në qendër, por po të shohim në 2-3 momente nëse do të shënonim, do ta kishim më të thjeshtë. Kishim rast me Kallakun, Carën që u vonua dhe Skukën. Mendoj se skuadra do të ishte më shumë në ekuilibër, pastaj minutat krijojnë ngërçin, lojtarët bëjnë gabime edhe në pasime të thjeshta. Sidomos kur do të organizosh manovrën sulmuese, ka disa situata në lojë që e drejtojnë lojtarët, gjendja e tyre emocionale, presioni për të shkuar te fitorja apo goli. Fitorja mund të sigurohet edhe në minutë të fundit, në shtesë, duhet të jesh i durueshëm.
Kemi pasur edhe situata e probleme fizike, por nuk është justifikim. Sa i përket spostimit të Malës në qendër, ishte zgjidhja ime pasi duhet të përshtatemi edhe ndaj ekipeve që luajmë. Duhej të ishim shumë më konkret, sidomos ne problemin e kemi te 20 metrat e fundit. Sa i përket lojtarit para mbrojtjes, duhet që Partizani e pjesa tjetër e skuadrës të përshtatemi se të gjithë që kam në atë pozicion janë lojtarë me natyre tjetër, jam munduar të përshtat lojtarët që kam.
Sa i përket objektivit, jam munduar që objektivi të jetë ndeshja e radhës, sepse duhet patjetër që nëse e shohim larg, nuk arrijmë atë që kemi afër. Sot mendoj se kemi humbur 2 pikë dhe skuadra duhej të ishte me kërkuese e personalitet në 20 metrat e fundit. Se Dinamo nuk na rrezikoi në asnjë moment. E vuajmë gjithmonë, jo vetëm sot, por edhe me Vllazninë, edhe pse ishim superiorë, humbim qetësinë në 20 metrat e fundit, kur duhej të ishim më të qetë në mënyrën që të shkojmë te goli.
Nuk është e lehtë të sinkronizosh lojën e Kallakut, jam munduar shumë që të sinkronizoj, por është e vështirë se edhe Skuka është lojtar që do më shumë hapësira dhe kur kundërshtari luan me shumë forca mbrapa. Skuka është një lojtar që duhet patjetër dhe jam munduar ta mësoj që të lëvizë e bëjë kundërveprime që t’i japë mundësi edhe Kallakut të japë pasin e fundit. Jam munduar shumë por linja e parë ka ndryshuara shumë, janë natyra të ndryshme dhe jam munduar që t’i marr maksimumin. Është shumë e vështirë se duhet kohë. Kjo nuk është për justifikim. Por ai pasi i fundit e vuajnë shumë skuadra të mëdha, mendoj që nxitohen se ndjejnë presionin që duan të marrin ndeshjen me patjetër”, tha Mehmeti.
