Monika Kryemadhi, kryetare e LSI, deklaroi mbrëmjen e sotme në “Zonë e Lirë” se Komisioni Hetimor parlamentar vonoi me 4 muaj hetimet e SPAK lidhur me inceneratorët.
Kryemadhi tha se në SPAK ndodhen 4 paditë e LSI lidhur me inceneratorët, ndërsa të gjitha dokumentet janë përkthyer dhe u janë dërguar ambasadave.
“Sot në test nuk është vetëm SPAK, por e gjithë reforma në drejtësi, përfshi edhe donatorët që kanë mbështetur këtë reformë, pasi janë shpenzuar 140 mln dollarë për këtë reformë”, tha Kryemadhi.
Lidhur me hetimin parlamentar, Kryemadhi tha se ky Komision nuk kishte asnjë kuptim, përderisa SPAK kishte nisur hetimet.
“Kur SPAK nis hetimet, atëherë pse ne duhet të kishim një komision hetimor, kur ne votuam me 140 vota këtë reformë? Dosjet janë në SPAK dhe prokurorët do të mbajnë përgjegjësi nëse nuk i shkojnë deri në fund hetimeve. Ne i kemi qëndisur provat dhe faktet në dosjet që kemi depozituar në Prokurorinë Speciale. Letrat janë aty, dokumentet janë aty, që provohen nga shpërdorimi i detyrës te evazioni fiskal”, tha Kryemadhi.
Lidhur me personat e shpallur në kërkim, Stela Gugallja dhe Klodian Zoto, Kryemadhi tha se njëri është në Shqipëri dhe tjetri në Austri.
Kryemadhi tha se pas nënshkrimit të kontratës me inceneratorin e Tiranës, Bashkia e Tiranës ka marrë angazhime, ndërsa Bashkia do të paguajë 84 mln euro deri në vitin 2048.
Ajo tha se nuk ka asnjë vendim të Këshillit Bashkiak lidhur me inceneratorin e Tiranës, ndërsa u shpreh se ky incenerator nuk ekziston, pra nuk është ndërtuar.
