“Kanë dalë me kërkesa a thua se sapo kanë zbritur nga hëna dhe nuk kanë informacion për ngjarjet në Tokë”, iu përgjigj Kryeministri Edi Rama, Shoqatës së Biznesit, e cila gjatë ditës së sotme parashtroi 9 kërkesa, duke paralajmvruar edhe protesta, nëse Qeveria nuk reagon.
Kryeministri tha se në një situatë të tillë, kërkesat e vendosura nga ana e kësaj shoqate i dukeshin të pakuptimta dhe sikur nuk kishin lidhje me realitetin, duke sjellë në vëmendje gjendjen e vështirë në të cilën ndodhen vendet sidomos pas luftës në Ukrainë.
“Ka një valë të inflacionit të shoqëruar me rritjen e cmimeve si një pasojë e rikthimit të fuqishëm të ekonomisë pas mbylljes dhe shtrëngimit nga pandemia. Ne jemi i vetmi vend apo me ndonjë përjashtim se nuk është se i kemi parë të gjitha vendet pa përjashtim që nuk e kemi prekur cmimin e energjisë. Në të gjitha komunikimet që kam pasur me kolegët në vigjilje të samitit dhe në takimet në Mynih, cështja themelore kanë qenë të energjisë. Ne jemi zotuar që do të bëjmë cmos për ta mbajtur nën kontroll cmimin e energjisë dhe për goditjen psikologjike që sjell në tërësi, sidomos për familjarët dhe biznesin e vogël.
Më vjen shumë keq që një grup përfaqësues i biznesit ka dalë me kërkesa a thua se sapo kanë zbritur nga hëna dhe nuk kanë informacion për ngjarjet në Tokë. Shpresoj të ketë qenë një moment lajthitje se të dalësh sot e të kërkosh të tilla qiqra ndërkohë që një hell i nxehtë ka filluar të rrotullohet në hijet e Europës, vetëm këtu mund të bëjë vaki”, tha Rama.
Përfaqësuesi i Dhomës së Tregtisë së Tiranës, Nikolin Jaka, tha sot se nëse qeveria nuk reagon, sipërmarrja do të përgjigjet deri në mbylljen e fabrikave, apo protestave masive së bashku me punonjësit.
DEKLARATA E PLOTË E SHOQATAVE TË BIZNESIT:
Biznesi kërkon zgjidhje nga qeveria për të përballuar krizën e energjisë elektrike
Kriza e energjisë elektrike është bërë kryefjala e ditës, pjesë shumë e ndjeshme e debateve publike dhe ekonomike. Por për sipërmarrjen çdo ditë e më shumë kjo krizë po bëhet një faktor kërcënues që po e çon drejt pamundësisë dhe falimentimit.
Përballja reale me këto çmime po vë në vështirësi një pjesë të madhe të bizneseve të industrive prodhuese, të cilët edhe pse mund të arrijnë të sigurojnë energjinë, po paguajnë një kosto të lartë për të, çka do të reflektohet tek kostoja e prodhimit e në vazhdim me efekt zinxhir te kostoja e produkteve të tregut të konsumatorëve.
Pjesa më e madhe e bizneseve në grupin që do të dalin në tregun e lirë janë në zonat e industrializuara dhe kryesisht mes Tiranës dhe Durrësit.
Kërcënohemi përballë një kolapsi ekonomik dhe social, pasi efekti që krijohet nga rritja e çmimeve tani do të jetë zinxhir me ndikim në të gjithë sektorët e ekonomisë.
Bizneset e mëdha prodhuese nuk mund ta përballojnë të vetme një rritje kaq të madhe të çmimit të energjisë elektrike, jemi të pambrojtur nga këto luhatje të tregut qoftë ndërkombëtar por edhe nga tarifat e shpërndarjes që ofrohen nga tregu vendas.
Për sipërmarrjet prodhuese, shpenzimet për energjinë elektrike zënë një pjese të konsiderueshme të kostos së prodhimit të çdo produkti e cila varion nga 20-40%, në varësi të teknologjisë së instaluar që përdoret për prodhim industrial.
Për këtë arsye Dhoma e Tregtisë dhe Industrisë Tiranë dhe Shoqatat e biznesit; Bashkimi i Prodhuesve Shqiptar, Qendra e Eksporteve Shqiptare, Bashkimi Tregtar i Shqipërisë, Shoqata e Konvertuesve të Plastikës, Dhoma Italiane në Shqipëri, Unioni Tregtar Agroushqimor dhe Industrial, Shoqata “Industria e Përpunimit të Qumështit”, Shoqata e Ricikluesve të Shqipërisë sjellin këtë deklaratëpublike me kërkesa për qeverinë shqiptare sa më poshtë vijon:
Të hiqet kufizimi ligjor prej 0.5 Mwi energjisë së rinovueshme për vetëkonsum dhe të lejohet në vlerë të barabartë me fuqinë e instaluar të operatorit ekonomik.
Të realizohet matja e balancës e konsumit dhe emetimit të energjisë në bazë vjetore. Energjia e emetuar nga vetë prodhuesi që përfitohet nga OSHEE, duhet të ketë njëçmim.
Qeveria të krijojë një mekanizëm për subjektet prodhuese të industrisë ushqimore që furnizohen në tensionin 35 dhe 110 kv për të qenë në të njëjtat kushte si konsumatorët e tjerë të këtij sektori të cilët furnizohen në linjat e tensionit 6/10/20 kv, nëpërmjet furnizimit te tyre nga operatoret shtetërore ose përmes një instrumenti financiar kompensimi.
Qeveria të krijojë një instrument financiar kompensimi për subjektetprodhuese që furnizohen në tensionin 35 dhe 110 kv për të qenë në të njëjtat kushte si konsumatorët e tjerë në linjat e furnizimit 6/10/20 kv.
Të garantohen parametrat e cilësisë së furnizimit me energji elektrike/sipas standardeve të BE-se, evitimi i ndërprerjeve të shpeshta të furnizimit, veçanërisht luhatjet e tensionit të rrjetit të cilat janë mbi normat teknike të lejuara nga teknologjitë, makineritë dhepajisjet e instaluara në biznese.
Të stimulohen investimet dhe në Hidrocentrale duke përdorur potencialin e disponueshëm në vend të barabartë me 800/ 1000 Mwp.
Të deklarohet nga qeveria data se kur do të bëhet funksionale Bursa Shqiptare e Energjisë;
Investimet në prodhimin e energjive të rinovueshme për vetëkonsum, të financohen 50% me kontributin e qeverisë dhe të mbulohen financimet me kredi 100% e vlerës së investimitnga garancia sovrane;
Për zbatimin e kërkesave të mësipërme, qeveria të formalizojë ngritjen e një grupi pune në përbërje të të cilit të ketë ekspertë nga Ministria e Energjisë dhe Infrastrukturës, Ministria e Financave dhe Ekonomisë dhe përfaqësues të organizatave të Biznesit.
Për të gjitha këto kërkesa të ngritura nga sipërmarrësit, presim një reagim për të marrë përgjigje nga qeveria, deri në datën 10 mars 2022, përndryshe sipërmarrja private nëpërmjet përfaqësuesve të saj do të shpalosë agjendën e reagimit e cila do të bëhet e ditur në vijim.
