Kryeinspektores së IMT-së në Sarandë, Romina Pulaj, e cila akuzohet për “shpërdorim detyre” se lejoi ndërtimin e një pallati 7 katësh, iu caktua masa e arrestit me burg nga Gjykata e Sarandës.
Sipas njoftimeve zyrtare nga Policia, biznesmeni Pando Papuçi kishte disa muaj që po ndërtonte një pallat shtatë katësh në kodrinën e qytetit, ndërsa Pulaj nuk ka ndërhyrë për të bllokuar punimet edhe pse ato ishin pa leje.
Nisur nga situata e krijuar, prokuroria bashkë me policinë kanë arrestuar Pulajn, ndërkohë që është shpallur në kërkim edhe biznesmeni Papuçi, i cili ishte edhe pronari i truallit ku ngrihej objekti.
Ndërkohë avokati i zyrtares së IMT e ka cilësuar vendimin e Gjykatës të padrejtë, ndërsa pohon se edhe vetë Prokurori ka pohuar në sallën e gjyqit se objekti ka pasur leje ndërtimi të vitit 2006. Avokati shpjegon se kryeinspektorja ka ndërmarrë të gjitha hapat ligjorë, duke kërkuar bllokimin e punimeve, si dhe ka vendosur gjobë.
Avokati shpjegon se edhe masa detyrim paraqitjeje ishte e tepërt në rastin në fjalë, pasi nga Pulaj, janë zbatuar të gjitha aktet që parashikon ligji.
