Lulzim Basha në fjalën e tij jashtë Kuvendit, i bëri thirrje drejtësisë se me të dhënat e Komisionit Hetimor tashmë ka indicie ligjore që SPAK të veproje. Sipas Bashës, koha për drejtësinë është e çmuar, kjo pasi ato që janë përfshirë mund të shkatërrojnë provat dhe intimidojnë dëshmitarët.
Basha tha se në kuadër të fakteve të grumbulluara një burim i sigurtë i pakonfirmuar akoma, tregon se të Enjten e kaluar një anëtar i PS-së, deputet, duhet që të ishte arrestuar, por makina është kthyer pas.
“Ne kemi raportime të pakonfirmuara, se të enjten e kaluar është nisur procesi i arrestimit të një prej zyrtarëve më të lartë të qeverisë dhe është kthyer mbrapsht. Ne kemi fakte të pa konfirmuara. Kur i them nuk i luan as topi. Raportime të pakonfirmuara, për sjellje të njëjtë në raport të paktën me një anëtar të grupit parlamentar të Partisë Socialiste. Anëtar të grupit parlamentar të Partisë Socialiste dhe deputet, përndryshe do e thoja ministër. Ndërkohë që komisioni hetimor ka nxjerrë në pah përgjegjësitë e kryebashkiakëve dhe të ministrave. Çfarë prisni më? Edhe një herë. Të flasim njëherë si njerëz me njëri tjetrin. Bëhet fjalë për bukën e fëmijëve shqiptarë, bëhet fjalë për bukën e prindërve, pensionistëve shqiptarë, bëhet fjalë për shkollat, spitalet, përditshmërinë e shqiptarëve. Imagjinoni se çfarë mund të ishte bërë me këtë shumë, është një shumë që shumica e shqiptarëve nuk e kuptojnë. 430 milion Euro nuk e kuptojnë”, tha Basha.
