Lulzim Basha ka zgjedhur Dibrën për të vijuar fushatën për zgjedhjet e 6 marsit, ditë kur do të mbahen zgjedhjet e pjesshme vendore në 6 bashkitë e vendit. Në Dibër në siglën e PD kandidon Luan Haka, për të cilin Lulzim Basha kërkoi votat e dibranëve, për ta zgjedhur kryebashkiak.
Basha shprehu bindjen se me 6 mars, kandidati Luan Haka, do të jetë kryebashkiaku i ardhshëm i Dibrës. Ai tha se drita e së vërtetës po djeg të gjitha gënjeshtrat dhe mashtrimet.
“Kjo dritë e së vërtetës do të djegë edhe Kryeministrin, i cili drejton qeverinë më hajdute dhe më keqbërëse, sikundër po vërtetohet çdo ditë nga Komisioni Hetimor parlamentar i inceneratorëve, i cili po provon se paratë e shqiptarëve kanë përfunduar në xhepat e disa personave në qeveri dhe të lidhur me të”, tha Basha.
Ai tha se së shpejti drejtësia do të vijojë të veprojë, pasi shqiptarët nuk e kanë hak varfërinë dhe mjerimin.
“Luan Haka është kandidati më i mirë për Dibren. Ai është pjesë e Dibres. Jam krenar që është kandidat i Partisë Demokratike. Ai do kujdeset për Dibrën, për dibranët.
Luani do ta bëjë Dibrën një vend më të mirë për të gjithë pavaresisht se është i djathtë apo i majtë, për ti shërbyer njerëzve dhe familjeve.
Dibra do votojë Partinë Demokratike, sepse dibranët nuk bien pre e sajesave dhe marifeteve të reja”, tha Basha.
Ai foli për rikthimin e besimit te të rinjtë dhe te familjet shqiptare. “Zotohem sot se ndryshimi është dhe mbetet misioni nr 1 i PD dhe i imi, le ta bëjmë ndryshimin e mundur hap pas hapi, ditë pas dite, le ta nisim nga 6 marsi, ku me votë masive të mbështesim kandidatët e PD në bashkitë ku me 6 mars ka zgjedhje”, tha Basha.
