Kryeministri Edi Rama u pyet nga Kryetarja e Komisionit hetimor për inceneratorët, Jorida Tabaku, se çfarë e bindi atë që ky proces ti besohej Mirel Mërtirit, Klodian Zotos dhe Stela Gugalljas, ndërsa tha se emrat e tyre nuk i kanë shkuar në tavolinë.
“Mua s´më kanë ardhur në tavolinë emrat, nuk kam lidhje fare, por unë mendoj se ata që i kanë zgjedhur ata kanë pasur të drejtë, ndërsa ju s´keni të drejtë. Kryeministri nuk merret fare me këtë punë”, tha Rama.
Ndërkohë i pyetur sepse nuk iu besua ky proces kompanive që kishin eksperiencë apo pse nuk u bë nga shteti, Rama nuk dha përgjigje direkte, edhe pse u shpreh që e ka në majë të gjuhës këtë përgjigje.
“Njeriu vihet në sprova dhe sprova e pushtetit është më e forta, sepse pushteti ka shumë tundime. Kjo do të thotë se ajo që unë si Kryeministër bëj, duke pasur parasysh këtë, por gjithçka del në dritën e diellit. Ata që mendojnë se mund të bëjnë në skuta atë që del në dritën e diellit, është arsyeja që unë kam dashur reformën në drejtësi. Sigurisht që kur kam dëgjuar akuzat tuaja dhe 430 mln euro, jam alarmuar, dhe më kanë thënë s´ka 430 mln euro. Kam dëgjuar akuzat tuaja, kam shkuar me vrap atje, dhe kam parë se plehrat mblidhen dhe përpunohen. Unë me ministrin e Mjedisit nuk kam folur kurrë për skutat dhe ato që bëhen nëpër skuta. Nëse ai për ato që dyshohet i ka bërë përballet me drejtësinë dhe t´ja provojnë”, tha Rama.
Ai u shpreh se unë di që Tirana, Fieri, Elbasani, po marrin frymë sepse plehrat po mblidhen e përpunohen. “Unë se di ku e keni gjetur atë 100 mln, sepse deri tani kemi shkuar në 86 dhe këto janë pagesa për shërbimet. Ju më thoni 29 euro për ton, ndërkohë që në vende të tjera si Spanja, Franca apo vend tjetër këto shifra janë dy apo shumë herë më të larta”, tha Rama.
