Tenderat nga institucionet zyrtare janë kthyer si ajo torta që ndahet mes kompanive, ku duket se kushti i vetëm është rotacioni, pra “x” kompani që sot mund të mos rezultojë fituese, në tenderin e rradhës është e para.
E gjitha kjo ka shkaktuar një situatë sa alarmante, lidhur me shpërdorimin e parave publike, aq edhe qesharake, kur trumpetohet me të madhe respektimi i procedurave, të cilat mbesin në letër, ndërsa realiteti është krejt tjetër.
Për ta kuptuar më mirë këtë mjafton të shihen tenderat për karburantet e automjeteve të makinave qeveritare apo institucioneve publike, të cilat kanë qenë ekskluzivitet i vetëm një firme.
Ndërkohë, tenderët e vegjël fitohen nga firmat e tjera. Ndoshta ata që fitojnë tenderët e mëdhenj i hapin rrugën këtyre të vegjëlve. Në fund fitojnë të gjithë, duke ndarë tregun edhe në karburantin e shtetit.
Por, të humbur janë pikërisht taksapaguesit shqiptarë, të cilët paratë e tyre merren të gjitha nga firmat. Por, jo vetëm kaq! Me paratë e taksave shtetarët e bëjnë jetën dhe punën e lehtë.
Sipas dokumenteve që disponon Boldnews.al, Drejtoria e Shërbimeve Qeveritare ka hapur një tender me objekt “naftë për automjete” me fond limit 14.935.200 lekë pa TVSH.
Në këtë procedurë ka marrë pjesë operatori ekonomik “Gega Center GKG”. Kjo firmë ka pasur një ofertë 14.935.200 lekë. Pra, sa 100 % e fondit limit.
Gega nuk ka lënë asnjë qindarkë nga ky tender, duke ngritur hije të mëdha dyshimi se gjithçka ka qenë e paracaktuar. Madje, drejtoresha Dhurata Frashëri, një mike e ngushtë e ministres Belinda Balluku, e ka firmosur personalisht këtë tender.
Dhe, përveç se të gjitha paratë e akorduara i mori firma, shqiptarët po paguajnë karburant për makinat e qeveritarëve.
