Dy kandidatët ë ‘Shtëpisë së Lirisë’ për zgjedhjet e 6 Marsit, përkatësisht Bardh Spahia për Bashkinë e Shkodrës, dhe Ardian Muka për atë të Durrësit, i janë përgjigjur ambasadores Yuri Kim, pas deklaratave të saj, se në zgjedhje ka kandidatë të sposorizuar nga persona non-grata, duke iu referuar ish-kryeministrit Sali Berisha.
I ftuar në emisionin “Të Paekspozuarit” në MCN TV, Spahia tha se deklaratat e ambasadores i konsideron si ndërhyrje në fushatë.
‘Më vjen t’i përgjigjem me një poezi të famshme. “I am the master of my faith, I am the captain of my soul” (Jam Zoti i fatit tim, kapiten i shpirtit tim). Askush përveç shpirtit dhe mendjes time, që më kanë orientuar tek ato zgjedhje që kam gjykuar si më të drejta për vendin tim’, tha Spahia.
Ndërkohë Muka tha se i cilëson deklaratat e Kim, si ndërhyrje në procesin zgjedhor, por deklaroi se ato nuk e shqetësojnë.
‘I konsideroj si ndërhyrje por nuk më shqetësojnë shumë. Të gjithë më njohin, si njeri të ndershëm. Nuk kam as monopol, as të vrarë me firmën time, si kandidatët të tjerë, që ambasadorja në mënyrë indirekte po i përkrah’, u shpreh Muka.
