Ish-Kryeministri Sali Berisha po merr pjesë në një takim elektoral të kandidatit Ardian Muka me qytetarët e Manzës. Muka ka paraqitur para banorëve vizionin e tij për Durrësin, ndërsa shprehu bindjen se me 6 mars durrsakët do ia kthejnë bashkisë qytetarëve.
“Do bëjmë ndryshimin e madh, ju do keni një bashkëpunëtor në Bashkinë e Durrësit, e cila prej 22 vitesh nuk i shërben qytetarëve. Ne nuk do të bëjmë gabimet që kryebashkiakët e 22 viteve kanë bërë me Durrësin. Kam parë shumë problematika kudo dhe unë mendoj se do t´i zgjidhim ato”, tha Muka.
Ai u shpreh se shumë banorë janë peng i Bashkisë për të marrë banesat e tyre, që janë gati, por po ju bëjnë presion për t´ju marrë votën.
“Bashkia e re nuk do të jetë shtëpia e pengut, ajo do të jetë shtëpia juaj, ju do gjeni dyert e hapura për problemet që keni. Ne të gjithë bashkë, me votë po rindërtojmë edhe opozitën”, tha Muka, duke shtuar se është rikthyer shpirti opozitar, falë lëvizjes së ish-Kryeministrit Berisha.
Ish-Kryeministri Sali Berisha duke marrë fjalën në takim ftoi qytetarët që të votojnë me 6 mars kandidatin Ardian Muka, të cilin e cilësoi si kandidatin e vërtetë të opozitës.
“Votoni Ardian Mukën, i cili ka ndërtuar jetën me djersën e tij, njëlloj si ju, pa pasur nevojën të trokasë në dyert e qeverive. Ai besimin tuaj do e shndërrojë në shërbime për ju. Qeveritarët që ju zgjidhni duhet të jenë shërbëtorë të qytetarëve. Sot Ardian Muka vjen te ju jo si kandidat i koalicionit “Shtëpia e Lirisë” apo i zyrtarëve të PD, por si një emër i zgjedhur nga ju, anëtarët e PD”, tha Berisha.
Berisha tha se në 6 mars janë zgjedhje vendore, por nuk ka gjë më të rëndësishme, kur pas 22 vitesh të një qeverisjeje abuzive, ju me votën tuaj të vendosni ndryshimin, pasi ju e meritoni ndryshimin.
“Durrësi dhe Shqipëria po rrokullisen, shqiptarët po varfërohen, kanë humbur shpresën dhe të vetmen alternativë që kanë pasur ishte të iknin, të emigronin”, tha Berisha.
