Detaje të reja janë publikuar nga ekzekutimi i 46-vjeçarit Altin Alikaj nga Vlora, i cili prej 8 ditësh nuk i përgjigjej në telefon të ëmës, e cila ndodhej Greqi.
Ai u shpall i zhdukur vetëm pak ditë më parë pas denoncimit në polici nga kushëriri i tij. Por ishte nëna ajo që e gjeti të pajetë në banesën e tyre këtë të shtunë sapo u kthye nga shteti fqinj.
Rrethanat se si është vrarë në banesë 46-vjeçari ende nuk dihen, ndërsa policia ka nisur hetimet.
Dyshohet se ai është qëlluar me armë në shpatull dhe është goditur e me sëpatë në kokë. Pranë trupit të pajetë është gjetur dhe sëpata me gjak. Mësohet se para krimit autori ka helmuar qenin e viktimës dhe kishte ulur automatin e energjisë.
Viktima jetonte vetëm në lagjen 24 maji. Ai njihej si përdorues droge, por pa precedentë penal. Rezulton se pak kohë më parë ka qenë në Kosovë dhe është kthyer ilegalisht në Shqipëri, pasi i kanë mbajtur pasaportën për arsye që ende nuk dihen.
Grupi hetimor dyshon se ngjarja mund të ketë lidhje me ndonjë konflikt në Kosovë.
