Punonjësit e riciklimit të mbetjeve në inceneratorin e Elbasanit kanë protestuar sërish ditën e sotme, për mos marrjen e pagave. Ata thanë se prej dy muajsh nuk kanë marrë pagat.
Punëtorët u shprehën se janë në vështirësi të mëdha ekonomike dhe paga që marrin aty është shpresa për familjet e tyre që të mund të sigurojnë minimumin e jetesës.
“Nuk na kanë paguar prej 2 muajsh, Na gënjejnë do i marrim sot apo nesër. Na kanë vonuar edhe herë të tjera. Na kanë kërcënuar se do na heqin nga puna nëse protestojmë. Në këtë punë po bëj 3 muaj”, tha për mediat një prej protestuesve.
Punonjësi tha se drejtuesit u kishin premtuar disa herë pagën, por nuk ua kishin dhënë atë.
Kompania Albtek Energy, e cila ka në zotërim koncesionin për ndërtimin e impiantit të trajtimit të mbetjeve në Elbasan përfshi inceneratorin, u sekuestrua në dhjetor të vitit qtë kaluar me vendim nga Gjykata e Posaçme Kundër Korrupsionit, ndërsa drejtuesja e saj Stela Gugallja, është arratisur. Pas vendosjes së sekuestros për kompaninë, u caktua si administrator shtetëror Arjan Baçi.
