Një person ka rënë në prangat e policisë së Shkodrës pasi akuzohet se shpërndate kanabis në afërsi të një shkolle dhe te lokali i tij.
“Nga Seksioni Kundër Trafiqeve të Paligjshme dhe Narkotikëve të DVP Shkodër, pas informacioneve të marra në rrugë operative se një shtetas shpërndante lëndë narkotike në afërsi të një shkolle, është organizuar puna dhe si rezultat u bë arrestimi në flagrancë i shtetasit M. Sh. 31 vjeç, banues në lagjen ‘Naim Gjylbegu’ Shkodër. Gjatë kontrollit të ushtruar në lokalin e këtij shtetasi, në lagjen ‘Naim Gjylbegu’, janë gjetur dhe sekuestruar në cilësinë e provës materiale 17 doza me lëndë narkotike cannabis sativa. Nga veprimet hetimore dyshohet se ky shtetas shpërndante lëndë narkotike në afërsi të një shkolle dhe në ambientet e lokalit të tij”, njoftoi policia.
I riu akuzohet për veprat penale “Prodhimi dhe shitja e narkotikëve” dhe “Përshtatja e lokalit për përdorim droge”.
