Ish-ministri dhe deputeti Genc Pollo e quan të drejtë vendimin e Kushtetueses që nuk shkarkoi Presidentin Ilir Meta, siç kërkonte mazhoranca.
Në një reagim, ai shprehet se Gjykata Kushtetuese vendosi të refuzojë mazhorancën mujshare, ndërsa shton se kërkesa për të shkarkuar Presidentin e Republikës u refuzua si pa bazë, pa thelb dhe pa argument.
Një vendim i drejtë e korrekt që duhet përshëndetur, thotë Pollo.
“Raporti 92 faqesh i dyshes Rama-Balla, i miratuar në plenare në qershorin e shkuar nga mazhoranca rilindisto-jeniçere, ishte një paçavure pseudojuridike. Pa arsyetim ligjor por plot me nota fejtoneske. Prandaj profesionalisht rrëzimi i saj do të ishte gjë e thjeshtë. Por gjyqtarët kushtetues që votuan pro vendimit të shpallur meritojnë konsideratë e respekt sepse i rezistuan presionit të shumanshëm të qeverisë. Përmes këtij vendimi ata ruajnë, aq sa është e mundur, ballancat kushtetuese të Republikës si dhe krijuan një precedent pozitiv për to”, shton ai në një reagim në FB.
Ndër të tjera uroj të mos kemi më opozita jeniçere që mundësojnë palaçollëqe të tilla siç kemi parë vjet e sivjet, përfundon ish-ministri.
