Kryebashkiaku i Elbasanit, Gledian Llatja, po dëshmon në Komisionin hetimor për Inceneratorët, ndërsa u shpreh se prej vitit 2007, ka një letër-këmbim mes institucioneve për ndërtimin e një impianti të trajtimit të mbetjeve në Bashkinë e Elbasanit.
Llatja tha se letrat i janë drejtuar në atë kohë qoftë ish-Kryeministrit Sali Berisha, qoftë ministrave të linjës.
“Nuk kam informacione lidhur me inceneratorin, shkresat apo lidhjet mes Klodian Zotos dhe Stela Gugalljas”, tha Llatja.
Llatja tha se gjithashtu ka pasur korrespodenca në vitin 2013 dhe 2014, ku flitej për landfill. Llatja iu referua disa shkresave ku flitej për gjendjen e emergjencës së plehrave në këtë bashki, duke theksuar se janë bërë edhe studimet lidhur me vendet ku mund të ngriheshin landfillet.
Llatja u pyet sepse u zgjodh inceneratori dhe jo landfilli si zgjidhje, ndërsa u shpreh se bazuar në shkresat flitet për vend-depozitim të mbetjeve.
“Flitet për vend-depozitim të përgjithshëm të mbetjeve në shkresat e vitit 2008, nuk e di nëse vend-depozitimet janë incenerator apo landfille. Kam një raport të madh ku flitet me detaje, por këtu thuhet për vend-depozitime”, tha Llatja.
Deputeti demokrat, Luçiano Boçi, e pyeti Llatjan nëse është mbyllur osejo emergjenca mjedisore, ndërsa ai tha se për çështjen e trajtimit të mbetjeve është zgjidhur, por problemi që kemi është ndotja e ambientit.
“Deri më tani kemi zgjidhur problemin e trajtimit të mbetjeve”, tha ai.
Boçi në replikë me Llatjan tha: në bazë të ligjeve të shtetit shqiptar, duhet një vendim për mbylljen e emergjencës mjedisore, a e keni miratuar një akt të tillë ose jo?
“Nuk e di që të ketë një akt të tillë për mbylljen e çështjes së emergjencës mjedisore”, tha ai.
