Ish-Kryeministri Sali Berisha u shpreh sot se të gjithë demokratët që kanë dhënë kontribute në Partinë Demokratike janë të mirëpritur në partinë e tyre.
Berisha tha se është e pakonceptushme dhe e pafalshme ajo që ka bërë Lulzim Basha, duke larguar nga PD figura të njohura, me kontribute të jashtëzakonshme në këtë parti.
“Arben Imamin e kërkuan shkodranët që të udhëhiqte fushatën në Shkodër, ndërsa Lulzim Basha e largoi. Po kështu largoi edhe Jozefina Topallin dhe shumë figura të tjera të njohura e me kontribute. Unë dua të kujtoj këtu sakrificat e Pjetër Arbnorit pas revolucionit komunist të 1997. Hyri në një grevë urie dhe po shkonte drejt vetëflijimit nëse nuk do të kishte një ndërhyrje të figurave më të njohura ndërkombëtare, përfshi këtu edhe Zhak Shirak apo Helmut Kohl”, tha Berisha.
Ish-Kryeministri tha se PD do të jetë një parti e hapur, konservatore, e cila mirëpret çdo kontribut të intelektualëve,që janë një vlerë jo vetëm për këtë qytet, por për të gjithë vendin.
