Nga Shkodra ku zhvilloi një takim me fermerë të zonës së Ana e Malit, në kuadër të fushatës së zgjedhjeve të 6 marsit, ish-Kryeministri Sali Berisha denoncoi marrëveshjet dhe bashkëpunimet mes Edi Ramës dhe Lulzim Bashës.
Berisha tha se ndërsa Rama e Basha po pasurohen, shqiptarët po humbasin shpresën dhe po largohen nga vendi.
“Kjo nuk është betejë mes Sali Berishës dhe Lulzim Bashës, por është një betejë për të mbrojtur pluralizmin. A mund të më thoni mua, pse Lulzim Basha kandidoi në Durrës një kandidat, Luan Hotin, i cili ka monopolin e shërbimeve nga Porti i Sarandës në atë të Shëngjinit? Këtë monopol e ka marrë me firmën e Edi Ramës dhe ua them unë, ose ai i ka çuar një valixhe me para, ose është në kuadrin e bashkëpunimit mes Lulzim Bravës dhe Ramës”, tha Berisha.
Në vijim ai akuzoi Bashën dhe Ramën se po bashkëpunojnë edhe për aferën në Portin e Durrësit, ku sipas tij, arabi u përdor vetëm për imazh, ndërsa kompanisë që i besohen 800 mijë m2 është një offshore e lidhur me Ramën dhe Bashën.
Ish-Kryeministri akuzoi Bashën edhe për dekonspirimin e një operacioni policor të së paku 4 vendeve, lidhur me atë që njihet si çështja e “Toyota Yaris”.
“Edi Rama ia mbylli çështjen e dekonspirimit të operacionit, por belgët jo. Ata erdhën dy herë dhe po hetojnë. E patë ju si kishte ndryshuar Lul Brava pasi u pyet nga Prokurorët belgë? Ata do vijnë sërisht në Shqipëri dhe u garantoj se do të ketë një tjetër status për Lul Bravën”, tha Berisha.
