Lulzim Basha ka reaguar përmes një deklarate lidhur me takimin elektoral të ish-Kryeministrit Sali Berisha në Shkodër, ku prezantoi kandidatin për kryebashkiak, Bardh Spahia, i cili garon në siglën e koalicionit “Shtëpia e Lirisë”.
Në deklaratën e publikuar në faqen zyrtare të PD së Bashës në rrjetin social, thuhet se aleanca e non gratave u shfaq edhe në Shkodër, por nuk u tha asnjë fjalë për Tom Doshin, ndërsa u derdh vrer e mllef ndaj demokratëve të ndershëm që qëndrojnë sot kryelartë para çdo shkodrani e shqiptari, që as nuk kanë abuzuar me pushtetin e tyre dhe as nuk i kanë mashtruar si ata që rrethojnë non gratën. Mashtrimet nuk e shpëtojnë dot.
“Kandidatët e “Shtëpisë së Ilirit” kanë vetëm një mision, të bëhen mburojë e non grates dhe të dëmtojnë Partinë Demokratike, për hallet dhe interesat e tyre. Demokratët e ndershëm shkodranë nuk mund të pranojnë të poshtërohen me kandidatë të LSI-së, që t’i përdorin më pas për pazarin e radhës me Edi Ramën, siç bëri në 2013-ën.
Demokratët nuk do të kthehen kurrë në shërbëtorë të aleancës së non gratave. Ata dhe çdo shqiptarë e di se çdo votë për Berishën dhe Metën mban Ramën, çdo votë për Ramën mban Berishën dhe Metën”, thuhet në reagimin e Bashës.
