Banorët e zonës së 5 Majit dhe ato të Laprakës vijojnë protestat e tyre, ndërsa kërkojnë nga Bashkia e Tiranës dhe Qeveria transparencë dhe zgjidhje lidhur me atë se çfarë do të ndodhë pas shembjes së banesave të tyre për shkak të planeve të lidhura me infrastrukturën apo rindërtimin.
Një protestuese nga zona e 5 majit tha se Kryeministri dhe Bashkia nuk i kanë dhënë zgidhje banorëve. “Në TV, Edi Rama na thonë ndryshe se do marrim 100%, metër për metër, por mbeten vetëm fjalë pa u firmosur askund. Ai thjesht na i jep në televizor por jo në realitet me kontratë ekzistuese”, tha banorja e 5 Majit.
Ndërkohë, një tjetër protestues nga zona e Laprakës shprehet se komunikimi i kryeministrit ka qenë nul fare atë ditë se nuk u ka dhënë asnjë lloj përgjigjie banorëve.
“Ai ka përdorur një gjuhë arrogante ndaj banorëve, vetëm është tallur me ne. Në numra jemi pak sepse kanë hyrë ata patronazhistat mes nesh dhe presione në shtëpi. Kush është në punë, nuk guxon me ardh këtu. Pra nga presioni i bërë këtu nuk janë shumë veta në protestë”, shprehet ai.
