Me 118 vota “pro”, asnjë kundër dhe 4 abstenim, parlamenti miratoi të Enjten nismën e mazhorancës për zgjatjen e mandatit të KPK-së dhe Komisionerit Publik, deri në deri në fund të vitit 2024.
Miratimi i ndryshimeve kushtetuese kërkonte votë të cilësuar, pra dritë jeshile prej 94 deputetë nga 140 që ka gjithsej parlamenti. Mazhoranca e vetme nuk i plotësonte votat, megjithatë në ndihmë i erdhi Lulzim Basha dhe mbështetësit e tij. Ky i fundit tha për gazetarët para seancës parlamentare se nëse nuk votohen ndryshimet kushtetuese, atëherë vetingu do të bëhet nga KLGJ e KLP dhe sipas tij, këto institucione janë të kapura nga mazhoranca.
Referuar procesverbalit të votimit, shumica e deputetëve që kanë shprehur haptazi mbështetje për Bashën e kanë dhënë votën pro ndryshimeve kushtetuese.
Megjithatë ka pasur dhe nga ata mbështetës së Bashës që kanë bojkotuar seancën e djeshme. Flutura Açka e Alfred Rushaj nuk ishin pjesë e seancës plenare.
Edhe Edi Paloka e Tomorr Alizoti munguan në seancë.
Deputetët e LSI-së, Monika Kryemadhi, Petrit Vasili e Erisa Xhiho kanë abstenuar. Në të njëjtën mënyre votoi dhe deputetja demokrate e Shkodrës, Emilia Koliqi.
Ligjvënësit që mbështesin Komisionin e Rithemelimit, përveç Palokës që mungoi në seancë, zgjodhën të mos votonin për nismën ligjore. Kështu Luan Baçi, Sali Berisha, Luçiano Boçi, Oerd Bylykbashi, Isuf Çelaj, Belind Këlliçi, Sorina Koti, Bujar Leskaj, Flamur Noka, Edmond Spaho, Agron Shehaj, Tritan Shehu dhe Albana Vokshi nuk morën pjesë në votim.
Nga mazhoranca, ‘nga rreshti doli’ ministrja e Energjetikës e Infrastukturës Belinda Balluku, e vetmja që nuk ka votuar pro nismës. Balluku, referuar procesverbalit, nuk ka votuar fare për ndryshimet kushtetuese, ndërkohë rezulton se ka votuar “pro” për ngritjen e komisioneve të posaçme parlamentare për reformën zgjedhore dhe atë administrative.
Gjithë deputetët e tjerë kanë votuar pro ndryshime kushtetuese. Edhe aleatët e PD-së si Fatmir Mediu, Dashamir Shehi, Mesila Doda, Agron Duka e Vangjel Dule, kanë zgjedhur të votojnë “pro” nismës.
/BN/
