Në debatin e përditshëm “Pika mbi i” me moderatoren Ola Bruka, Spartak Ngjela, ka paralajmëruar se do të ketë shumë shpejt arrestime ministrash dhe ish-ministrash nga të dy krahët.
Sipas tij Edi Ramës dhe Sali Berisha janë të dy të rrezikuar nga drejtësia e re.
“Saliu ishte i trembur nga shtyrja e afatit të Vettingut. Ka të drejtë. Janë dy ministra të Ramës nën arrest për korrupsion, të cilët rrezikojnë Ramën. Mund të dalin dhe dy ministra të tjerë. Edhe ish-kryeministri, edhe kryeministri, janë në rrezik. korrupsioni po avancon dhe ata nuk e lënë gjykatën të ngelet pa bërë Vettingun deri në fund. Duke u nisur nga precedenti kroat, që është si ky i yni dhe drejtohej nga Uashingtoni dhe ai, 1 mijë të arrestuar ka atje. Këtu mund të vejë edhe më thellë. Midis Saliut dhe Ramës është më i favorizuar Rama. Saliu e kishte forcën, por e humbi, se nuk ju nënshtrua Bashës, iku nga PD. Ai donte ta merrte partinë për këtë arsye, që ajo të mos jepte 2/3, por nuk e arriti dot, se nuk di të luftojë, lufton kundër Amerikës me broçkulla. Saliu dhe Rama janë të rrezikuar, se kanë bishtat mbrapa, që do të kalojnë nëpër procese. Rama do të fitojë diçka, kurse Berisha asgjë, ka ikur, ka marrë rrugën për në burg. Burgut mbase dhe i shpëton se mund të ketë mbrojtje, por ka marrë rrugën drejt procesit gjyqësor. Kur kërkon të bësh reforma të mëdha, ai që ka mazhorancën, di të marrë benefite. Që Rama do të shkojë drejt procesit, nuk ka diskutim, por edhe benefite ka. Vettingu ka tronditur gjithë gjyqësorin, që ishte skëterrë. Akoma është skëterrë, 40% e tyre janë të listuar për t’u hequr, por nuk ja ka ardhur akoma radha për investigim”.
Pasi u pyet nga analistit, Artur Zheji, se kush janë ministra e tjerë që do të arrestohen, Ngjela tha se sipas informacioneve të tij ata janë nga të dy krahët (PS-PD), por goditja do të nisë majtas.
“Janë disa ministra, në të dy krahët. Janë dhënë shenjat në treg, që ka dy ose tre të tjerë, në të dy krahët. Mua më doli fjala, që i ra majtas. Antikorrupsioni ka filluar majtas, tani nuk e di si do të vazhdojë. I pari e bëri Bonaparti, që i ra majtas, kur erdhi në pushtet, pastaj e mori djathtas. Edhe këtu të dy krahët do të goditen, nuk shpëtojnë dot. Por, ata që e drejtojnë, e njohin precedentin botëror. SPAK-un e drejton Sekretari i Shtetit, ai foli botërisht. Ata e kanë drejtuar dhe në Kroaci, por këtu është më e rreptë historia”, tha ai.
