Kryeministri, Edi Rama ka dhënë një deklaratë për mediat menjëherë pasi ka përfunduar mbledhjen me kryesinë e PS, mbledhje e cila filloi në orën 20:00 të mbrëmjes së sotme dhe zgjati për më shumë se një orë e gjysmë.
Rama u pyet për vendimin e Kuvendit për të zgjatur mandatin e Vettingut, një nismë që u votua edhe nga deputetë të PD. Kryeministri u pyet sesi kishte arritur që të bindte deputetët e PD për të votuar pro dhe nëse ndërkombëtarët kishin një rol të caktuar.
Ai u përgjigj se nuk kishte pasur negociata në anglisht dhe shtoi se kishte 2 parti Demokratike duke theksuar se nuk kishte bërë asnjë lloj negociate për miratimin e zgjatjes së Vettingut.
Rama: Kemi zgjatjen e mandatit për një proces të dhimbshëm dhe të vështirë por është një proces i pastrimit të një grumbulli të madh, sepse në Shqipëri nuk ka pasur kurrë drejtësi. Ua them atyre që habiten, se në Shqipëri nuk ka pasur kurrë drejtësi. Ajo që kemi bërë ne është e paprecedentë sepse kemi ecur me shpejtësi të skëterrshme. Të vazhdojë të pastrojë se ka ende shumë llum.
Pyetje: Ka pasur negociata mes PD dhe PS apo kanë qenë ndërkombëtarët ata që kanë ndërmjetësuar? Si i bindët aq lehtë që të votonin pro?
Rama: Nuk e di për çfarë negociatash në anglisht e keni fjalën, ne nuk bëjmë negociata në anglisht. Pastaj, të cilës PD, për cilën prej tyre e keni fjalën? Se ky është problemi, ka dy parti demokratike kështu që duhet ta shohim, ne nuk negociojmë me asnjërën prej tyre.
